O'zbekistonda “Raqamli iqtisodiyot sharoitida iqtisodiy xavfsizlikni ta'minlash” mavzusida ilmiy- amaliy anjuman bo'lib o'tdi

 

Bosh prokuratura huzuridagi Iqtisodiy jinoyatlarga qarshi kurashish departamenti, Alkogol va tamaki bozorini tartibga solish inspeksiyasi hamda Toshkent davlat iqtisodiyot universiteti tomonidan “Raqamli iqtisodiyot sharoitida iqtisodiy xavfsizlikni ta’minlash: muammolar va yechimlar” mavzusida Respublika ilmiy-amaliy anjumani o‘tkazildi.

 

Anjumanda Bosh prokuratura, Markaziy bank, Iqtisodiyot va moliya vazirligi, Korruptsiyaga qarshi kurashish agentligi, Savdo-sanoat palatasi, soliq va bojxona qo‘mitalari vakillari, amaliyotchilar, tadbirkorlar, shuningdek, olimlar, professor-o‘qituvchilar va ilmiy izlanuvchilar ishtirok etdi.

 

Tadbirning asosiy maqsadi jamoatchilik ongi va iqtisodiy subyektlar ongida iqtisodiy xavfsizlik tushunchasini kengaytirish, raqamli iqtisodiyot sharoitida yuzaga kelayotgan tahdid va xavf-xatarlarni ilmiy jihatdan tahlil qilish hamda iqtisodiy huquqbuzarliklarga qarshi kurashda samarali muhitni shakllantirishga qaratilgan.

 

Anjumanda quyidagi yo‘nalishlar muhokama qilindi:

• Iqtisodiy xavfsizlik sohasida qonunchilik bazasini mustahkamlash;
• Iqtisodiyotdagi huquqbuzarliklarning oldini olish, shu jumladan byudjet mablag‘lari sarflanishi ustidan nazorat tizimini takomillashtirish;
• Tadbirkorlik va kichik biznesning iqtisodiy xavfsizligini ta’minlash va qo‘llab-quvvatlashning ilmiy-amaliy jihatlari;
• Yashirin iqtisodiyot ko‘lamini qisqartirishda raqamli texnologiyalardan foydalanish;
• Jinoiy faoliyatdan olingan daromadlarni legallashtirish, terrorizm va ommaviy qirg‘in qurollarini moliyalashtirishga qarshi kurash samaradorligini oshirish.

 

Shuningdek, anjuman doirasida Toshkent davlat iqtisodiyot universiteti va Alkogol va tamaki bozorini tartibga solish inspeksiyasi o‘rtasida hamkorlik memorandumi imzolandi. Memorandum inspeksiya va universitetning yashirin iqtisodiyot ko‘lamini tahlil qilish, baholash va tadqiqotlar o‘tkazish, takliflar ishlab chiqish sohasidagi hamkorligini yanada mustahkamlashga xizmat qiladi.

 

Anjuman yakunida ilmiy taklif va amaliy tavsiyalar ishlab chiqilib, ularni realizatsiya qilish choralarini ko‘rish belgilandi. Tadbir mamlakatimizda iqtisodiy barqarorlikni mustahkamlash, raqamli islohotlar samaradorligini oshirish va iqtisodiy xavfsizlik madaniyatini yuksaltirishga xizmat qiladi.