Toshkentda 10-sinf bola YPX xodimini urib yubordi
Inspektor tan jarohatlari bilan shifoxonaga yotqizilgan.
Ijtimoiy tarmoqlarda Toshkent shahrining Mirobod tumanida voyaga yetmagan bola YPX xodimini urib yuborgani va oqibatda xodim og‘ir ahvolda reanimatsiya bo‘limiga yotqizilgani haqida xabarlar tarqalgandi. Bosh prokuratura holat yuzasidan maʼlumot berdi.
Qayd etilishicha, 25 fevral kuni soat 21:46 da 2010 yilda tug‘ilgan voyaga yetmagan bola, xususiy maktabning 10-sinf o‘quvchisi “BMW M4” rusumli avtomashinani haydovchilik guvohnomasisiz boshqarib, Mirobod tumani Mirobod ko‘chasi bo‘ylab harakatlanib kelayotgan vaqtda Toshkent shahar IIBB YHXB YPX inspektorini urib yuborgan.
YPX inspektori tan jarohatlari bilan shifoxonaga yotqizilgan.
“Mazkur holat yuzasidan prokuratura tomonidan tergovga qadar tekshiruv harakatlari olib borilmoqda. Tekshiruv yakunlariga ko‘ra qonuniy qaror qabul qilinishi taʼminlanadi”, deyiladi xabarda.
