Urush meni “do‘stlari yo‘q inson”ga aylantirdi — Zelenskiy

 

Ukraina Prezidenti Vladimir Zelenskiy urush uning shaxsiy hayoti va dunyoqarashiga sezilarli taʼsir ko‘rsatganini maʼlum qildi.

 

Maʼlumotlarga ko‘ra, jurnalistning “urush sizni qanday inson qilib qo‘ydi?” degan savoliga davlat rahbari dastlab bu savolga aniq javob berish qiyinligini bildirgan. Keyinchalik esa u o‘zini “do‘stlari yo‘q inson”ga aylangandek his qilayotganini qayd etgan.

 

Prezidentning taʼkidlashicha, urush sharoitida u faqat muhim va strategik masalalarga eʼtibor qaratishga majbur bo‘lgan. “Do‘stlarim bilan muloqot qilishga vaqtim yo‘q, ammo sheriklarim, muhim hamkorlarim bilan doimiy aloqadaman. Endi do‘stlar yoki shaxsiy munosabatlar uchun vaqt qolmayapti”, — degan u.

 

Ukraina rahbari, shuningdek, Rossiya tomonidan boshlangan urush natijasida o‘zini yana-da bardoshliroq his qilayotganini taʼkidlagan. Uning so‘zlariga ko‘ra, u hozir ko‘proq jiddiy masalalarga eʼtibor qaratmoqda.

 

Mazkur bayonot 24-fevral kuni Ukraina, Shimoliy va Boltiqbo‘yi davlatlari sammitidan so‘ng o‘tkazilgan matbuot anjumanida aytilgan. Tadbir davomida ishtirok etgan Yevropa yetakchilari ham Zelenskiyning yetakchilik fazilatlari kuchayganini qayd etishgan.

 

Jumladan, Aleksandr Stubb Ukraina yetakchisi og‘ir sinov sharoitida haqiqiy yetakchilik namunasini ko‘rsatganini taʼkidlagan.