Adliya vazirligi “KIA K9”ni egasiga qaytarib berdi
Vazirlikning ma’lum qilishicha, vaqtincha tekin foydalanib turish uchun taklif taklif qilingan avtotransport vositasidan vazirlikda foydalanish zarurati qolmagan.
Adliya vazirligi “ROODELL” MChJdan “sovg‘a sifatida” qabul qilgan KIA K9 rusumli avtomobilini tashkilotga qaytarib berdi. Bu haqda Zamon.uz so‘roviga javoban Adliya vazirligi matbuot xizmati ma’lum qildi.
Joriy yilning 12-fevral kuni Adliya vaziri A. Toshqulov imzosi ostida vazirlik “ROODELL” MChJ balansida bo‘lgan, 2023-yilda ishlab chiqarilgan KIA K9 PREMIUM rusumli avtotransport vositasi vaqtinchalik foydalanish uchun tekin foydalanish shartnomasi asosida vazirlik qabul qilgan. Bu haqda “Revizor” Telegram kanali ma’lum qilgan edi.
Vazir tomonidan imzolangan buyruqda Avtotransport vositasidan foydalanish bilan bog‘liq yoqilg‘i-moylash materiallari va texnik xizmat ko‘rsatish xarajatlari amaldagi me’yorlarga muvofiq Adliya vazirligi hisobidan amalga oshirilishi belgilangan.
“Formal-huquqiy jihatdan, davlat organlari mulkni bepul foydalanishga qabul qilishi mumkindir. Lekin davlat xizmatida etika va manfaatlar to‘qnashuvi masalasi ham bor.
Nima uchun xususiy kompaniya davlat organiga yuqori toifadagi avtomobilni bepul taqdim etadi? Hujjatda bu savolga javob yo‘q”, - deyiladi “Revizor” Telegram kanalida.
Orginfo ma’lumotlariga ko‘ra, “ROODELL” MChJ avtotransport vositalari savdosi bilan shug‘ullanib keladi. Tashkilot 2010-yil 10-may kuni ro‘yxatdan o‘tgan. MCHJ Toshkent shahri, Sirg‘ali tumanida faoliyat yuritadi.
Ochiq manbalardagi ma’lumotlarga ko‘ra, bu MCHJ faoliyati Jizzax viloyatidagi “ADM Jizzax” MCHJga borib taqaladi.
Shundan so‘ng zamon.uz ushbu holat bo‘yicha Adliya vazirligi Axborot xizmat boshlig‘i Xayot Qlichev bilan bog‘landi.
U bu holat bo‘yicha agar rasmiy izoh kerak bo‘lsa tahririyat tomonidan rasmiy xat bilan chiqishi kerakligini va qonunda belgilangan tartibda javob qaytarishini ma’lum qildi.
Zamon.uz 19-fevral kuni vazirlik pochtasiga so‘rov xatini yubordi.
Adliya vazirligi bugun, 27-fevral kuni tahririyatimiz so‘roviga javob qaytardi.
Unda yozilishicha, “ROODELL” MCHJ tomonidan Adliya vazirligiga vaqtincha tekin foydalanib turish uchun taklif taklif qilingan KIA K9 rusumli avtotransport vositasini vazirlikda foydalanish zarurati qolmaganligi sababli MChJga qaytarib berilgan.
