Istanbulda o'ldirilgan o‘zbekistonlik Sayyora uchun g‘oyibona janoza o‘qildi
Marosimda marhumaning ota-onasi hamda jamoatchilik vakillari ishtirok etdi.
Turkiyaning Istanbul shahri Umraniye tumanidagi uylarning birida o‘ldirilgan O‘zbekiston fuqarosi Sayyora Ergashalieva uchun g‘oyibona janoza namozi o‘qildi. Bu haqda Turkiya mahalliy ommaviy axborot vositalari xabar berdi.
Avvalroq Shishli tumanida chiqindi konteyneridan jasadi bo‘laklangan holda topilgan Durdona Hokimova bilan bir uyda yashagan Sayyora Ergashalieva ham ayni shaxslar tomonidan o‘ldirilgani aniqlangan edi. Uning jasadi ham Umraniyedagi o‘sha uyda bo‘laklarga ajratilgani qayd etilmoqda.
Marhumaning g‘oyibona janoza namozi Shishli tumanidagi Fulya mahallasida joylashgan Fulya Mehmetchik masjidida o'qildi. Marosimda Sayyoraning otasi Bahrom Bo'stanov va onasi Sohiba Bo'stanova, shuningdek, jamoatchilik vakillari hamda masjid jamoasi a’zolari ishtirok etgan.
Dafn marosimida so‘zga chiqqan ota-ona qizlari xotirasini yod etib, Turkiya adliya tizimiga ishonch bildirib, aybdorlarga nisbatan eng qat’iy jazo chorasi qo‘llanishini talab qildi. Ular marosimni tashkil etishda ko‘maklashganlarga minnatdorlik izhor etgan.
Hozirda mazkur jinoyat yuzasidan tergov harakatlari davom etmoqda. Rasmiy idoralar tomonidan qo‘shimcha ma’lumotlar e’lon qilinishi kutilmoqda.
