Otamurodga “Prezident sovg‘asi” — BYD Chazor topshirildi
O’zbekiston Prezidenti yoshlar bilan o‘tkazgan muloqoti davomida xorazmlik Otamurod Rayimboyevni “Prezident sovg‘asi” bilan taqdirlagan edi.
Avvalroq Ko‘ksaroy qarorgohida bo‘lib o‘tgan Shavkat Mirziyoyevning yoshlar bilan uchrashuvida Xorazm viloyati Urganch tumani 11-son bolalar musiqa va san’at maktabining 4-sinf o‘quvchisi Otamurod Rayimboyev o‘zining yuksak ijro mahoratini namoyish etgan edi.
Yosh iste’dod egasi O‘zbekiston xalq artisti Komiljon Otaniyozov repertuaridan qo‘shiqni jonli ijroda kuylab, yig‘ilganlarda katta taassurot qoldirgan. Uning sahnadagi ishonchli chiqishi va tabiiy iste’dodi Prezident tomonidan alohida e’tirof etilib, yosh ijodkorga avtomobil sovg‘a qilishga qaror qilingani haqida xabar berilgan edi.
Bugun mazkur maxsus sovg‘a viloyat hokimi Jo‘rabek Raximov tomonidan Otamurod Rayimboyevga uning oila a’zolari hamda ustozlari ishtirokida tantanali ravishda topshirildi.
Marosim davomida yosh ijodkor va uning ota-onasi davlat rahbarining bunday yuksak e’tibori va rag‘bati uchu minnatdorlik izhor etdilar. Ta’kidlanganidek, bunday e’tirof yosh avlodni san’at va ijod yo‘lida yanada katta marralarni zabt etishga ruhlantiradi.
