Pokiston Afg‘onistonga ochiq urush e'lon qildi

 

27-fevralga o‘tar kechasi Pokiston Qurolli kuchlari Afg‘oniston hududidagi Kobul va Qandahor shaharlariga aviazarbalar berdi. Bu haqda hukumat rasmiysiga tayanib, BBC ma’lum qildi.

 

Pokiston bosh vaziri Shahboz Sharif mamlakat har qanday tajovuzkor harakatlarga munosib javob qaytarishga qodir ekanini ta’kidladi. Uning so‘zlariga ko‘ra, davlat suvereniteti va hududiy yaxlitligini himoya qilish masalasida murosa bo‘lmaydi hamda har qanday tahdid qat’iy choralar bilan qarshi olinadi.

 

Bosh vazir matbuot kotibi Mosharraf Zaydiy bayonotiga ko‘ra, zarbalar oqibatida 27 ta “Tolibon” harbiy posti vayron qilingan, to‘qqiztasi egallab olingan. Shuningdek, 80 dan ortiq tank, artilleriya vositalari va qurolli transport texnikasi yo‘q qilingani bildirilgan.

 

Zaydiy ma’lumotiga ko‘ra, operatsiyalar davomida 133 nafar “Tolibon” a’zosi halok bo‘lgan, 200 dan ortiq kishi jarohat olgan. Shu bilan birga, Afg‘oniston tomoni ham so‘nggi harbiy harakatlar davomida qarshi tomonga sezilarli yo‘qotishlar yetkazilganini da’vo qilmoqda.

 

Pokistonning hujumi 26-fevral kuni Afgʻonistonning oltita chegara viloyatida, shuningdek, Kobul rasman tan olmaydigan Durand chizigʻi yaqinida Pokiston va Afgʻoniston harbiy xizmatchilari oʻrtasida qurolli toʻqnashuvlariga javob bo'ldi.

 

Pokiston mudofaa vaziri Xavaja Asif esa mavjud vaziyatni “ochiq urush” deya baholab, rasmiy Islomobod avval diplomatik kanallar orqali masalani hal etishga uringanini, biroq natija bermagach, harbiy choralar ko‘rishga majbur bo‘lganini ma’lum qildi.