Toshkentda YPX xodimini urib yuborgan BMW “prava”si yo‘qlarga 18 marotaba berilgan
Ushbu transport vositasi 2002-yilda tug‘ilgan qizga tegishli bo‘lib, avtomobil 2024-yildan shu kunga qadar 18 marotaba transport vositasini boshqarish huquqi bo‘lmagan shaxsga haydash uchun berilgan.
Toshkent shahrida YPX xodimini avtomobil bilan urib yuborgan 10-sinf o‘quvchisi avval ham o‘zboshimchalik bilan transport vositasini boshqarib, yo‘l harakati qoidalarini qo‘pol ravishda buzgani aniqlangan. Bu haqda Toshkent shahar Ichki ishlar bosh boshqarmasi matbuot xizmati maʼlum qildi.
Bildirilishicha, voyaga yetmagan shaxsning maktabda dars qoldirgani sababli uning ota-onasi 2025-yil 12-sentabr kuni, shuningdek, o‘zboshimchalik bilan avtomobil boshqarib, yo‘l harakati qoidalarini buzganligi uchun 2026-yil 8-yanvar kuni Maʼmuriy javobgarlik to‘g‘risidagi kodeksning 47-moddasi (bolalarni tarbiyalash va ularga taʼlim berish borasidagi majburiyatlarni bajarmaslik) asosida maʼmuriy javobgarlikka tortilgan hamda ular bilan profilaktik suhbat o‘tkazilgan.
Shunga qaramay, ota-onalarning loqaydligi va yetarli nazoratning yo‘qligi oqibatida voyaga yetmagan shaxs tomonidan navbatdagi qoidabuzarlik sodir etilgan.
Aniqlanishicha, YPX xodimini urib yuborishda ishtirok etgan BMW rusumli avtomobil 2002-yilda tug‘ilgan Leyla Atadiyanovaga tegishli bo‘lib, mazkur shaxs 2024-yildan hozirgi kunga qadar 18 marotaba transport vositasini boshqarish huquqiga ega bo‘lmagan shaxslarga haydash uchun bergan. Bundan tashqari, u tomonidan yana 37 marotaba boshqa turdagi yo‘l harakati qoidalari qo‘pol ravishda buzilgani qayd etilgan.
Hodisa ortidan voyaga yetmagan shaxs o‘z qilmishidan pushaymon ekanini bildirib, YPX xodimi hamda uning yaqinlaridan uzr so‘ragan. U ilgari ogohlantirilganiga qaramay, yana avtomobilni o‘zboshimchalik bilan olib chiqqanini tan olgan.
Bolaning otasi ham jamoatchilikdan uzr so‘rab, o‘z loqaydligi oqibatida og‘ir oqibatlar yuz berishi mumkin bo‘lganini taʼkidlagan.
Mazkur holat yuzasidan O‘zbekiston Respublikasi Jinoyat kodeksining 266-moddasi (transport vositalari harakati yoki ulardan foydalanish xavfsizligi qoidalarini buzish) bilan jinoyat ishi qo‘zg‘atilgan. Hozirda dastlabki tergov harakatlari olib borilmoqda.
