Hal qiluvchi palladamiz — Rizo Pahlaviy Eron xalqiga murojaat qildi
Eron sobiq valiahd shahzodasi AQSh tomonidan va’da qilingan yordam yetib kelayotganini aytib, yakuniy g‘alaba Eron xalqiga tegishli bo‘lishini bildirdi.
Eron sobiq valiahd shahzodasi Rizo Pahlaviy mamlakat xalqiga murojaat yo‘llab, Eron “hal qiluvchi pallaga” kirganini ta’kidladi. U o‘z chiqishida Islom Respublikasi rejimiga qarshi kurashning yakuniy bosqichi yaqinlashayotganini bildirdi.
Pahlaviy AQSh prezidenti tomonidan Eron xalqiga va’da qilingan yordam yetib kelayotganini qayd etib, bu yordam Eron xalqiga emas, balki “zulm apparati” deb atagan amaldagi tuzumga qarshi qaratilganini aytdi. Uning ta’kidlashicha, yakuniy g‘alabaga Eron xalqining o‘zi erishadi.
“Biroq bu yordam kelganiga qaramay, oxirgi g‘alaba baribir bizniki bo‘ladi. Bu oxirgi jangni biz – Eron xalqi yakunlaymiz. Ko‘chalarga qaytish vaqti yaqinlashdi”, degan u.
Sobiq shahzoda mamlakat qurolli kuchlari, politsiya va xavfsizlik xizmatlariga murojaat qilib, ularni Islom Respublikasi rahbariyatini emas, balki Eron va uning xalqini himoya qilishga chaqirdi. “Sizning burchingiz xalqni himoya qilishdir”, deya ta’kidladi u.
Ma’lumot uchun, Pahlaviy 1979-yilgi Islom inqilobigacha mamlakatni boshqargan Pahlaviylar sulolasi vakili bo‘lib, hozirda xorijda yashaydi va so‘nggi yillarda hukumatga qarshi norozilik namoyishlarini qo‘llab-quvvatlab kelmoqda.
Uning murojaati mintaqadagi harbiy-siyosiy vaziyat keskinlashib borayotgan bir paytda yangradi. 28-fevral kuni Isroil kuchlari Erondagi harbiy obyektlarga zarba berganini Isroil mudofaa vaziri Israel Katz tasdiqlagan edi. Operatsiyadan so‘ng mamlakatda favqulodda holat e’lon qilingan.
