Isroil Erondagi boshlang‘ich maktabga zarba berdi
Hodisa oqibatida salkam 60 nafar bola halok bo‘lgan.
Isroil Eronning janubidagi Minab shahrida joylashgan qizlar maktabiga raketa zarbasi berdi. Mehr axborot agentligi va mahalliy rasmiylar maʼlumotiga ko‘ra, hujum oqibatida kamida 57 nafar bola halok bo‘lgan, yana 48 nafari turli darajada jarohat olgan.
Ayni paytda voqea joyida qidiruv-qutqaruv ishlari davom etmoqda, vayronalar ostida qolganlarni izlash ishlari olib borilmoqda.
Eron tashqi ishlar vaziri Abbos Aroqchiy hujumga munosabat bildirib, zarba oqibatlari aks etgan videokadrlarni eʼlon qildi. U Eron xalqiga qarshi sodir etilgan “jinoyatlar javobsiz qolmasligini” taʼkidladi.
Eron Tashqi ishlar vazirligi matbuot kotibi Ismoil Baqoiy ham hujumni “ochiq jinoyat” deb atab, BMT Xavfsizlik kengashini zudlik bilan chora ko‘rishga chaqirdi.
Al-Jazeera telekanali muxbiri Muhammad Vallning Tehrondan xabar berishicha, taʼlim muassasasiga berilgan zarba AQSH va Isroilning “faqat harbiy obyektlar nishonga olinmoqda” degan bayonotlarini shubha ostiga qo‘ymoqda.
