O‘zbekistonning Isroildagi elchixonasi o‘zbekistonliklarni ogohlikka chaqirdi
Mintaqadagi vaziyat keskinlashayotgani sababli gavjum joylarga bormaslik va mahalliy ko‘rsatmalarga amal qilish tavsiya etildi.
O‘zbekistonning Isroildagi elchixonasi Isroil hududida bo‘lib turgan o‘zbekistonliklarga murojaat bilan chiqib, ulardan yuqori darajada ehtiyotkor bo‘lishni so‘radi.
Diplomatik vakolatxona fuqarolarga gavjum joylarga bormaslik, zaruratsiz ayrim hududlarda harakatlanmaslik, mahalliy hokimiyat organlari ko‘rsatmalariga qatʼiy amal qilish hamda yaqinlari bilan doimiy aloqada bo‘lib turishni tavsiya etdi. Shuningdek, shaxsni tasdiqlovchi hujjatlarni doimo o‘zi bilan olib yurish muhimligi taʼkidlandi.
Mazkur murojaat mintaqadagi xavfsizlik vaziyati keskinlashib borayotgan bir paytda yangradi. Xususan, AQSH Davlat departamenti Amerika elchixonasining ayrim xodimlari va ularning oila aʼzolariga Isroil hududini tark etishga ruxsat berganini maʼlum qildi. Ularga tijorat aviareyslari mavjud bo‘lgan davrda mamlakatni tark etish tavsiya etilgan.
Shuningdek, The New York Times nashri favqulodda choralar Eron hududiga qarshi ehtimoliy harbiy amaliyotga tayyorgarlik bilan bog‘liq bo‘lishi mumkinligini yozgan. Nashrga ko‘ra, bunday ssenariy mintaqadagi keskinlikning yana-da kuchayishiga olib kelishi ehtimoldan xoli emas.
Elchixona O‘zbekiston fuqarolarini vaziyatni rasmiy manbalar orqali kuzatib borishga va xavfsizlik qoidalariga qatʼiy rioya qilishga chaqirdi.
