1 martdan gaz narxlari oshirilgani rad etildi
Energetika vazirligi narxlar oshmaganini, biroq qish mavsumida belgilangan ijtimoiy meʼyor o‘zgarganini bildirdi.
Ijtimoiy tarmoqlarda 1 martdan tabiiy gaz narxi oshgani haqida xabarlar tarqalmoqda. Bunga Energetika vazirligi munosabat bildirdi.
Qayd etilishicha, 1 martdan tabiiy gaz narxi oshirilmagan. To‘lovlar eski tarifda amalga oshiriladi. Biroq 1-martdan boshlab qish mavsumida belgilangan ijtimoiy meʼyor o‘zgardi.
Taʼkidlanishicha, isitish mavsumida tabiiy gaz isteʼmoli bo‘yicha bazaviy meʼyor 5 barobarga (100 metr kubdan 500 kub metrga) oshirilgan edi.
Xususan, noyabr — fevral oylarida har bir oy uchun 500 kub metrgacha, mart — oktyabr oylarida esa har oy uchun 100 kub metrgacha “bazaviy meʼyor” belgilangan.
Bu tartib Qoraqalpog‘iston Respublikasi va Xorazm viloyatida oktyabr — fevral oylarida amal qiladi.
Shu sababli, bugun, 1 martdan 31 oktyabrga qadar har oy uchun 100 kub metrgacha “bazaviy meʼyor” amal qiladi.
Eslatib o‘tamiz, Prezidentimizning qarorlariga asosan ehtiyojmand oilalarga ishlatilgan elektr energiyasi va tabiiy gaz uchun davlat tomonidan har oyda kompensatsiya beriladi.
Jumladan, kompensatsiya miqdori elektr energiyasi uchun — oyiga bazaviy meʼyordan ortiq (200 kVt·soatdan keyingi) 150 kVt·soatgacha, tabiiy gaz uchun — qish oylarida 250 kub metrgacha, boshqa oylarda 150 kub metrgacha bazaviy meʼyordan ortiq foydalanilgan qismi uchun kompensatsiya beriladi.
“Ilgari kompensatsiyalar faqat qish oylarida amal qilgan bo‘lsa, endi — yil davomida har oyda berilmoqda”, deyiladi xabarda.
