Alirizo Arafiy Eronning vaqtincha rahbari etib tayinlandi

Eronda vaqtincha boshqaruv tizimi ishga tushirildi. 67 yoshli nufuzli ruhoniy Alirizo Arafiy uch kishilik boshqaruv kengashi aʼzosi etib tayinlandi va unga vaqtincha Oliy rahbar vazifalarini bajarish yuklatildi.

 

Mazkur kengash Eron Konstitutsiyasiga muvofiq shakllantirilgan bo‘lib, yangi oliy rahbar Ekspertlar assambleyasi tomonidan saylanguniga qadar davlat rahbarining vakolatlarini amalga oshiradi. Kengash tarkibiga Eron prezidenti Masʼud Pezeshkiyon, sud hokimiyati rahbari Golamhossein Mohseni Ejei va Alirizo Arafiy kiritilgan.

 

Alirizo Arafiy Eron diniy-siyosiy tizimida katta tajribaga ega shaxs sifatida tanilgan. U Ekspertlar assambleyasi raisining o‘rinbosari, Qo‘riqchilar (Posbonlar) kengashi aʼzosi hamda mamlakatdagi diniy taʼlim tizimi rahbari sifatida faoliyat yuritgan. Shuningdek, u Qum shahridagi yirik diniy markazlardan biri — seminariya tizimiga rahbarlik qilgan va xalqaro islomiy taʼlim muassasalarida ishlagan. Arafiy marhum oliy rahbar Ali Xomanaiyning ishonchli vakillaridan biri hisoblangan.

 

Eronda oliy rahbar armiya, xavfsizlik kuchlari va strategik qarorlar ustidan keng vakolatlarga ega bo‘lgani bois, mazkur lavozim atrofidagi har qanday o‘zgarish ichki va tashqi siyosatga bevosita taʼsir ko‘rsatadi.

 

Hozirda Ekspertlar assambleyasi yangi oliy rahbarni saylash jarayonini boshlashi kutilmoqda. Shu vaqtgacha esa uch kishilik boshqaruv kengashi mamlakatda konstitutsiyaviy boshqaruvni taʼminlash va siyosiy tizim barqarorligini saqlash vazifasini bajaradi.