Dubaydagi o‘zbekistonliklar vaqtinchalik ro‘yxatdan o‘tishga chaqirildi
Taʼkidlanishicha, bu axborot xususiyatiga ega bo‘lib, evakuatsiya bilan bog‘liq emas.
Bosh konsulxona Dubay shahrida bo‘lib turgan O‘zbekiston Respublikasi fuqarolarini vaqtinchalik ro‘yxatdan o‘tishga chaqirdi.
Qayd etilishicha, ushbu ro‘yxatdan o‘tish maʼlumotlarni yangilash va Dubay shahrida vaqtinchalik bo‘lib turgan O‘zbekiston Respublikasi fuqarolarining taxminiy sonini aniqlash, shuningdek, zarurat tug‘ilganda tezkor aloqani taʼminlash uchun zarur.
“Sizdan quyidagi havola orqali o‘tib, vaqtinchalik konsullik hisobiga turish anketasini to‘ldirishingizni so‘raymiz. Eʼtibor bering: mazkur hisobga olish faqatgina axborot xususiyatiga ega bo‘lib, evakuatsiya bilan bog‘liq emas”, deyiladi xabarda.
Anketani to‘ldirish jarayonida mamlakat va konsullik muassasasini tanlash bo‘limida quyidagini belgilash lozim: O‘zbekiston Respublikasining Dubaydagi Bosh konsulxonasi (GK RUz V Dubaye).
