Eron prezidenti televideniye orqali ko‘rinish berdi
U o‘z chiqishida AQSH va Isroilga javob zarbalari davom ettirilishini bildirdi.
Eron prezidenti Masud Pezeshkiyon AQSH–Isroil hujumlaridan keyin ilk bor jamoatchilik oldiga chiqib, davlat televideniyesi orqali videomurojaat bilan chiqish qildi.
Murojaatda u mamlakatda tuzilgan uch aʼzolik muvaqqat Rahbarlar kengashi bugundan boshlab o‘z vazifalarini rasman bajarishni boshlaganini maʼlum qildi. Ushbu kengash oliy rahbar vakolatlarini yangi rahbar saylanguniga qadar amalga oshiradi.
Pezeshkiyon o‘z chiqishida Eron armiyasi AQSH va Isroil tomonidan amalga oshirilgan hujumlarga javob qaytarishda davom etishini taʼkidladi. U mamlakat xavfsizligi va suverenitetini himoya qilish davlatning ustuvor vazifasi ekanini qayd etdi.
Maʼlumotlarga ko‘ra, oliy rahbar Ali Xomanaiy Isroil–AQSH hujumida nishonga olinganidan keyin mamlakat Konstitutsiyasiga muvofiq uch nafardan iborat muvaqqat rahbariyat kengashi shakllantirilgan. Kengash davlat rahbarining asosiy vakolatlarini vaqtincha bajaradi.
Eronning yangi oliy rahbarini esa 88 nafar diniy ulamodan iborat Ekspertlar Assambleyasi saylaydi. Mazkur organ mamlakatda oliy rahbarni tayinlash va uning faoliyati ustidan nazorat qilish vakolatiga ega.
