“Hizbulloh” Isroil va AQSHga qarshi urushga kiryapti
Guruh rasmiy manbalari Isroil hududiga dastlabki zarbalar berilganini maʼlum qildi.
Livandagi “Hizbulloh” harakati Isroil va AQSHga qarshi urushga kirayotganini rasman eʼlon qildi. Tashkilotning bayonotiga ko‘ra, qaror mintaqadagi so‘nggi voqealar, xususan Eron atrofidagi keskinlik va harbiy harakatlar fonida qabul qilingan.
Guruh rasmiy manbalari Isroil hududiga dastlabki zarbalar berilganini maʼlum qildi. Aytilishicha, nishonlar orasida harbiy obyektlar va chegaraga yaqin infratuzilmalar bo‘lgan. Biroq hujumlar ko‘lami, qurbonlar yoki yetkazilgan zarar haqida hozircha mustaqil tasdiqlangan maʼlumotlar yo‘q. Isroil armiyasi esa vaziyatni nazorat qilayotgani va havo hujumidan mudofaa tizimlari ishga tushirilganini bildirgani haqida mahalliy OAVlar xabar tarqatmoqda.
“Hizbulloh” o‘z bayonotida harakatlarini “qarshilik doirasidagi majburiy javob” deb atab, Isroil va AQSHni mintaqadagi keskinlik uchun masʼul deb ko‘rsatgan. Tashkilot, shuningdek, hujumlar davom etishi mumkinligini istisno qilmagan.
Tahlilchilar fikricha, agar to‘qnashuvlar kengaysa, bu Livan–Isroil chegarasida to‘liq harbiy mojaroga aylanishi va Yaqin Sharqdagi vaziyatni yana-da izdan chiqarishi mumkin. Ayniqsa, Eron, Isroil va AQSH o‘rtasidagi ziddiyatlar fonida “Hizbulloh”ning ochiq urush eʼlon qilishi mintaqaviy xavfsizlikka jiddiy tahdid sifatida ko‘rilmoqda.
