“Islom olami zudlik bilan chora ko‘rishi shart” — Erdo‘g‘an

Turkiya prezidenti Rajab Toyyib Erdo‘g‘an Isroil va AQSHning Eronga qilgan hujumlarini qoraladi hamda bu harakatlar Eron suverenitetini ochiqchasiga buzishini taʼkidladi.

 

Erdo‘g‘anning so‘zlariga ko‘ra, Turkiya do‘st va qardosh Eron xalqining tinchligiga tahdid solayotgan bugungi hujumlardan qayg‘uda va tashvishda. Uning taʼkidlashicha, Isroil provokatsiyalari bilan boshlangan hujumlar mintaqadagi vaziyatni yana-da keskinlashtirgan. Turkiya tomoni uzoq vaqt davomida kelishmovchiliklarni muloqot yo‘li orqali hal qilishga harakat qilgani, mintaqadagi boshqa davlatlar ham diplomatik imkoniyatlarini ishga solgani aytildi. Biroq, Erdo‘g‘an fikricha, Isroilning jarayonni izdan chiqarishga qaratilgan urinishlari tufayli tomonlar o‘rtasidagi ishonch inqirozini bartaraf etish imkoni bo‘lmagan.

 

Shu bilan birga, Turkiya rahbari Anqara Eronning Fors ko‘rfazidagi birodar davlatlarga har qanday sabab bilan hujum qilishini qabul qilmasligini bildirdi. U vaziyatni barqarorlashtirish uchun diplomatik tashabbuslarni faollashtirish niyati borligini aytdi.

 

Erdo‘g‘anning taʼkidlashicha, Turkiya sulh tuzilishi va muzokaralar qayta boshlanishi uchun zudlik bilan diplomatik harakatlarni kuchaytiradi. U og‘ir davrda mintaqadagi birodar xalqlarni qo‘llab-quvvatlash davom ettirilishini ham qayd etdi.

 

Prezidentning fikricha, sog‘lom aql va hushyor yondashuvsiz diplomatiyaga yo‘l ochilmaydi va mintaqa olov ichida qolishi mumkin.

 

“Urush kengaymasligi, yana-da ko‘p qon to‘kilmasligi va mintaqamiz yana-da ko‘proq aziyat chekmasligi uchun barcha tomonlar, eng avvalo islom olami zudlik bilan chora ko‘rishi shart”, — dedi Erdo‘g‘an.