“Siz Eron xalqining qalbini kuydirib yubordingiz”

Eron Milliy Xavfsizlik Kengashi kotibi Ali Lorijoniy AQSH boshchiligidagi sionistlar hujumidan omon qolgan fors davlati hukumatining eng yuqori lavozimdagi vakillaridan biri sifatida chiqish qildi. U davlat telekanallarida eʼlon qilgan bayonotda Eronning qurolli kuchlari o‘z imkoniyatlari va tayyorgarligining faqat bir qismidan foydalanganini, mamlakat hukumati va xalqning sodiqligini isbotlaganini taʼkidladi.

 

Lorijoniyning so‘zlariga ko‘ra, dushman rahbarlarni o‘ldirish Eronni beqarorlashtiradi deb o‘ylash noto‘g‘ri, chunki Eron xalqi o‘z rahbariyatiga sodiqligini ko‘rsatgan. U shu bilan birga: “Siz Eron xalqining qalbini kuydirib yubordingiz, biz esa buning evaziga sizning qalbingizni kuydirib yuboramiz”, deb ogohlantirdi.

 

Mustamlakachi kuchlar, Lorijoniy taʼkidlaganidek, biror mamlakatga kirganda uning resurslarini talon-taroj qilishga harakat qiladi va hozirda AQSHdagi ishlar uchun masʼul shaxs bu talonchilikning to‘liq ramzidir. Uning so‘zlariga ko‘ra, bu vaziyatga qarshi Muvaqqat Rahbariyat Kengashi tashkil etiladi.

 

Shuningdek, Lorijoniy Eron xalqining tarixiy og‘ir sinovlardan o‘tganini eslab, mamlakatning bugungi sinovdan ham yuzi yorug‘ chiqishiga ishonch bildirdi: “Mo‘g‘ullar butun Eronni vayron qilgan, biroq xalqimiz ularga qarshi mardonavor kurashgan. Bu fojia nihoyatda alamli; bunday buyuk shaxs – Oyatulloh Ali Xomanaiyning vafoti qalblarimizni yaraladi va millatimizni motamga cho‘mdirdi. Ammo marhum Imom aytganidek, bunday shahidlik xalqni yana-da sobitqadam qiladi. Millatimiz o‘ziga xos fitratga ega va inshaalloh, bu og‘ir sinovdan ham yuzi yorug‘ bo‘lib o‘tadi”, dedi u.