Surxondaryoda o‘qituvchilardan pul yig‘ishni buyurgan “zamhokim” ishdan olindi
Hozirda uning harakatlariga huquqiy baho berish choralari ko‘rilmoqda.
Surxondaryo viloyatining Jarqo‘rg‘on tumanida o‘qituvchilardan pul yig‘ish bo‘yicha topshiriq bergan hokim o‘rinbosari ishdan olindi. Bu haqida viloyat hokimligi axborot xizmati rahbari maʼlum qildi.
Qayd etilishicha, Jarqo‘rg‘on tumanidagi 33-sonli umumtaʼlim maktabi pedagog xodimlaridan pul mablag‘lari majburiy tartibda yig‘ilayotgani haqidagi xabar yuzasidan tayinlangan xizmat tekshiruvi yakunlangan.
Tekshiruv viloyat hokimi nazoratida o‘tkazilib, holatlar kompleks tarzda o‘rganilgan, hujjatlar tahlil qilingan va masʼul shaxslarning tushuntirishlari olingan. Natijada Jarqo‘rg‘on tumani hokimining o‘rinbosari Anvar Rajabov tomonidan berilgan ko‘rsatma amaldagi qonunchilik talablariga zid ekani, xususan, ixtiyoriylik tamoyili buzilgani aniqlangan.
Xizmat tekshiruvi xulosasiga muvofiq Anvar Rajabov egallab turgan lavozimidan ozod etilgan. Shu bilan birga, uning harakatlariga huquqiy baho berish uchun tekshiruv materiallari belgilangan tartibda huquqni muhofaza qiluvchi organlarga yuborilgan.
