Toshkentda yana havo sifati yomonlashdi
Bunga sovuq havo massasi kirib kelishi sabab bo‘lgan.
Kecha, 28 fevraldan boshlab respublikaga nisbatan sovuq havo oqimi kirib kelishni boshlagan. Toshkent shahri va Toshkent viloyati hududida shamol deyarli kuzatilmayapti. Xususan, kechasi (+3…+5°S) va kunduzi (+11…+15°S) o‘rtasidagi keskin harorat farqi ertalabki tuman va harorat inversiyasi shakllanishiga sabab bo‘ldi. Ayni damda shahar nisbatan salqin havo massasi taʼsiri ostida bo‘lib turibdi, yog‘ingarchilik kutilmayapti.
Ushbu meteorologik omillar taʼsirida atmosferaning yerga yaqin qatlamlarida havo almashinuvi sekinlashdi, bu esa ifloslantiruvchi moddalar tarqalishini cheklamoqda. Shu munosabat bilan hozirgi vaqtda Toshkent shahri va Toshkent viloyatida atmosfera havosida mayda dispers zarrachalar (PM2.5 va PM10) konsentratsiyasining oshishi kuzatilmoqda.
Sinoptiklar prognozlariga ko‘ra, ertadan boshlab kutilayotgan yog‘ingarchiliklar havo sifati ko‘rsatkichlarining yaxshilanishiga olib keladi.
