Xomanaiy vafotidan so‘ng minglab eronliklar ko‘chaga chiqdi

Oyatulloh Ali Xomanaiy vafot etgani haqidagi xabarlar ortidan Eronda ikki xil munosabat kuzatilmoqda. Minglab odamlar uni xotirlash uchun Tehron ko‘chalariga chiqqan. Davlatga yaqin manbalar va ijtimoiy tarmoqlarda tarqalgan videolarda ayrim ziyoratgohlar, jumladan Imom Husayn ziyoratgohi atrofida odamlar motam tutayotgani aks etgan.

 

Tehronning Inqilob maydonidagi odamlar AQSH va Isroil hujumlarida halok bo‘lgan Oyatulloh Xamanaiy uchun motam tutmoqda. Isfahonda esa o‘n minglab motamdorlar to‘planmoqda.

 

Kadrlarda to‘planganlar marhum oliy rahbar uchun duo qilayotgani, ayrim joylarda esa “Amerikaga o‘lim” va “Isroilga o‘lim” deya shiorlar yangrayotgani ko‘rinadi. Bu holat Erondagi siyosiy va jamoatchilik kayfiyatining keskinlashganini ko‘rsatmoqda.

 

Shu bilan birga, The New York Times nashrining yozishicha, tunda Tehron va boshqa ayrim shaharlarda katta guruhlar ko‘chalarga chiqib, Homanaiyning halokati haqidagi xabarni nishonlagan. Nashr bu holatni jamiyat ichidagi qarashlar turlicha ekanining ifodasi sifatida baholagan.

 

Eron rasmiylari Oyatulloh Ali Homanaiyning o‘limi uchun qasos olinishi haqida ogohlantirdi. Hukumat va Islom inqilobi qo‘riqchilari korpusi tarqatgan bayonotlarda aybdorlar jazosiz qolmasligi taʼkidlandi.

 

Eron hukumati bayonotida “to‘liq kuch va qatʼiyat bilan bu jinoyatning aybdorlari va tashkilotchilarini qilgan ishlaridan pushaymon qilamiz”, deyilgan. Rasmiy Tehron ushbu hodisani og‘ir jinoyat sifatida baholab, tegishli choralar ko‘rilishini maʼlum qildi.