AQSh bilan hech qanday muzokara olib borilmaydi — Eron
Tehron AQSh bilan muzokaralar o‘tkazish ehtimolini qat’iyan rad etdi va vositachilar orqali aloqalar haqidagi xabarlarni asossiz deb atadi.
Eron rasmiylari AQSh bilan muzokaralar olib borish ehtimolini qat’iyan rad etdi. Bu haqda Eron Oliy milliy xavfsizlik kengashi kotibi Ali Larijoniy ma’lum qilgan.
Uning ta’kidlashicha, Tehron Vashington bilan hech qanday muzokaralar olib borish niyatida emas. Siyosatchi bu haqda o‘zining X ijtimoiy tarmog‘idagi sahifasida bayonot berib, vositachilar orqali mumkin bo‘lgan diplomatik aloqalar haqidagi xabarlarni “noto‘g‘ri va uzoqni ko‘ra bilmaydigan” deb atagan.
“Biz Amerika bilan hech qanday muzokaralar olib bormaymiz”, — deya yozgan Larijoniy.
U shuningdek, Donald Tramp siyosatini tanqid qilib, uning qarorlari Yaqin Sharqdagi vaziyatni yanada keskinlashtirganini ta’kidladi. Larijoniyga ko‘ra, “Amerika birinchi o‘rinda” shiori amalda “Isroil birinchi o‘rinda” tamoyiliga aylangan va amerikalik harbiylar mintaqadagi mojarolarning qurboniga aylanmoqda.
Mazkur bayonot The Wall Street Journal nashrida e’lon qilingan xabarlarga javoban bildirilgan.
Nashrda Larijoniy go‘yoki Ummon orqali Eron yadroviy masalasi yuzasidan AQSh bilan diplomatik maslahatlashuvlarni qayta boshlash tashabbusini ilgari surgani haqida yozilgan edi. Biroq eronlik siyosatchi bu ma’lumotlarni qat’iyan rad etdi.
Avvalroq esa AQSh prezidenti Donald Tramp Tehron Vashington bilan muzokaralar olib borishga tayyor ekanini bildirganini ma’lum qilgan edi.
