AQSh va Isroil zarbalari oqibatida Eronda 500 dan ortiq kishi halok bo‘ldi
Hujumlar davomida Eronning 131 shahri nishonga olingan.
Eron hududiga berilgan zarbalar oqibatida 500 dan ortiq kishi halok bo‘ldi. Bu haqda Fars axborot agentligi Eron Qizil Yarim Oy jamiyati ma’lumotlariga tayanib xabar berdi.
Ma’lum qilinishicha, AQSh va Isroil tomonidan amalga oshirilgan hujumlar natijasida kamida 555 kishi halok bo‘lgan. Qutqaruv xizmatlari vayronalar ostidan jasadlarni olib chiqish ishlarini davom ettirmoqda.
Hozirda mamlakat bo‘ylab 100 mingdan ortiq qutqaruvchi va favqulodda xizmatlar xodimlari qidiruv-qutqaruv ishlariga jalb qilingan.
Dastlabki ma’lumotlarga ko‘ra, zarbalar davomida Eronning 131 shahri turli darajada nishonga olingan.
Eslatib o‘tamiz, 28-fevral kuni Isroil AQSh ko‘magida Eron hududiga harbiy zarbalar berishni boshlagan edi. Hujumlar oqibatida Eronning Oliy rahbari Ali Xomanaiy hamda bir qator yuqori martabali harbiy va davlat amaldorlari halok bo‘lgani xabar qilingan.
