Doha aeroportida qolib ketgan o‘zbekistonliklarga yordam ko‘rsatilayotgani ma’lum qilindi
28-fevral kuni Qatar havo hududining vaqtincha yopilgani tufayli Toshkentga qaytayotgan 48 nafar O‘zbekiston fuqarosi aeroportda qolib ketgan.
O‘zbekistonning Dohadagi elchixonasi ma’lum qilishicha, Yaqin Sharqdagi notinchlik fonida Qatarda bo‘lib turgan 600 ga yaqin O‘zbekiston fuqarosi orasida jabrlanganlar aniqlanmagan.
“Dunyo” axborot agentligi xabariga ko‘ra, 28-fevral kuni Qatar havo hududining vaqtincha yopilishi oqibatida Toshkentga qaytayotgan 48 nafar o‘zbekistonlik Doha aeroportida qolib ketgan.
Aviakompaniyalar favqulodda vaziyat sabab yo‘lovchilarni mehmonxona bilan ta’minlay olmagan. Elchixona xodimlari zudlik bilan aeroportga yetib borib, holatni o‘rgangan. Muzokaralar natijasida fuqarolar, jumladan, ijtimoiy tarmoqlar orqali yordam so‘ragan vatandoshlar vaqtinchalik mehmonxonalarga joylashtirilgan.
"Qatar havo hududi ochilib, parvozlar tiklanishi bilan fuqarolarimizning Vatanga xavfsiz qaytishi ta’minlanadi. Vaziyat elchixonaning doimiy nazoratida bo‘lib, yo‘lovchilar ro‘yxati muntazam yangilab borilmoqda", deyiladi xabarda.
Diplomatik vakolatxona yurtdoshlarimizni vahimaga tushmaslikka, faqat rasmiy manbalarga tayanishga hamda xavfsizlik yuzasidan odamlar gavjum joylardan saqlanib, mahalliy qonun-qoidalarga amal qilishga chaqiradi.
Fuqarolar murojaatlari yuzasidan elchixona konsuli Otabek Muratov bilan bog‘lanish mumkin: +974 5141 1001.
