Nukusdagi ayrim mahallalar aholisiga bog‘cha puli 50 foizga kamaytiriladi
Qoraqalpog‘iston Respublikasini ijtimoiy-iqtisodiy rivojlantirish bo‘yicha yangi dastur tasdiqlandi.
Adliya vazirligining ma’lum qilishicha, prezidentning 21-fevral PQ–70-sonli qarori bilan tasdiqlangan Qoraqalpog‘iston Respublikasini ijtimoiy-iqtisodiy rivojlantirish bo‘yicha yangi dastur doirasida 1-apreldan ma’muriy boshqaruv jihatdan Nukus shahri tarkibiga kiruvchi “Qaratau” va “Bestobe” mahalla fuqarolar yig‘inlari aholisiga davlat maktabgacha ta’lim tashkilotlari uchun to‘lov 50 foizga qisqartiriladi.
Shuningdek, maydoni 5 ming kvadrat metrdan yuqori bo‘lgan savdo komplekslari va mehmonxona xizmatlari bo‘yicha mazkur hududda faoliyatini amalga oshirayotgan tadbirkorlarga 2027-yil 1-yanvardan 2040-yil 1-yanvarga qadar yer solig‘i va mol-mulk solig‘i stavkalari 90 foizga kamaytirilgan holda qo‘llaniladi.
Qarorga muvofiq, 2026-yil yakuniga qadar yalpi hududiy mahsulot 8,1 foizga, sanoat ishlab chiqarish 8 foizga oshiriladi. Hujjatda ishsizlik darajasini 4,2 foizga, kambag‘allikni 3,2 foizga tushirish, Nukus shahri, Qo‘ng‘irot va Chimboy tumanlari hamda 109 ta mahallani ishsizlik va kambag‘allikdan xoli hududga aylantirish belgilangan.
2030-yilga borib esa eksport hajmini 900 mln dollarga, yalpi hududiy mahsulotni 102,4 trln so‘mga yetkazish, qishloq xo‘jaligi ishlab chiqarishini oshirish va sanoat hamda xizmatlar sohasida 7,2 mlrd dollarlik loyihalarni amalga oshirish rejalashtirilmoqda.
Shu bilan birga, Vazirlar Kengashi Raisining Ekologiya va Orolbo‘yi hududini rivojlantirish bo‘yicha birinchi o‘rinbosari lavozimi tugatilib, chorvachilik va yaylovlardan samarali foydalanish masalalari bo‘yicha yangi o‘rinbosar lavozimi joriy etildi.
