O‘zbekistonning Isroildagi elchixonasi fuqarolarni mamlakatni vaqtincha tark etishga chaqirdi

“Dunyo” axborot agentligining xabar berishicha, Yaqin Sharq mintaqasidagi vaziyatning keskinlashuvi ortidan O‘zbekistonning Isroildagi elchixonasi fuqarolarni mamlakatni tark etishga chaqirdi.

 

 

Vatandoshlarga hushyorlikni saqlash, Isroil hukumati tomonidan belgilangan xavfsizlik choralariga qat’iy rioya qilish va imkon qadar keyingi ko‘rsatmalar olingunga qadar maxsus jihozlangan xavfsiz hududlarda bo‘lish hamda vakolatxona rasmiy ko‘rsatmalarga diqqat bilan amal qilish, zaruratsiz ko‘chaga chiqishni cheklash va xotirjamlikni saqlash tavsiya qilindi.

 

 

Shuningdek, fuqarolarga vaziyat barqarorlashgunga qadar Isroil hududini vaqtincha tark etish tavsiya qilingan. Elchixona Isroil-Misr chegarasida "Begin" chegara o‘tish punkti tun-u kun ishlashini, shu bilan birga, O‘zbekiston fuqarolarining Sinay yarimoroliga kirishi uchun viza talab qilinmasligini eslatib o‘tdi.

 

 

“Chegaradan o‘tishni tezlashtirish maqsadida chegara bojlarini oldindan onlayn tarzda to‘lash tavsiya etiladi. Boshqa quruqlikdagi o‘tish punktlaridan foydalanish tavsiya etilmaydi, ularning ish vaqti o‘zgarishi mumkinligi sababli, sayohatni rejalashtirishdan oldin dolzarb ma’lumotlarni aniqlashtirish zarur”, deyiladi xabarda.

 

 

Elchixona fuqarolaridan O‘zbekiston Tashqi ishlar vazirligi va xorijdagi diplomatik vakolatxonalarning rasmiy manbalaridagi yangiliklarni muntazam kuzatib borishga hamda Isroil xizmatlarining ogohlantirishlari va tavsiyalarini inobatga olishni so‘radi.

 

 

Bayonotda qayd etilishicha, favqulodda vaziyatlarda vatandoshlar quyidagi telefon raqamlar va pochta manziliga murojaat qilishlari mumkin:

 

 

• telefon raqamlari: 03−672−2466, 03−672−2371, 03−758−5075, 03−758−5076, +972 54 485 1397;

• elektron pochta: il.uzembassy@mfa.uz.