Prezident Shavkat Mirziyoyev O‘zbekiston fuqarolarini Fors ko‘rfazi davlatlaridan evakuatsiya qilishni buyurdi
Jidda—Toshkent yo‘nalishida repatriatsiya reyslarini tashkil etishga alohida e’tibor qaratish vazifasi yuklatildi.
Prezident Shavkat Mirziyoyev Fors ko‘rfazi mamlakatlarida bo‘lib turgan yurtdoshlarni vatanga qaytarishni samarali tashkil etish yuzasidan bosh vazir Abdulla Aripovga topshiriq berdi.
2-mart kuni Vazirlar Mahkamasida o‘tkazilgan videoselektor yig‘ilishida topshiriq ijrosini ta’minlash masalalari muhokama qilindi. Yig‘ilishda fuqarolarni xavfsiz va tizimli ravishda O‘zbekistonga olib kelish bo‘yicha zarur choralar va aniq vazifalar belgilab olindi.
Xususan, mamlakatdagi barcha aviakompaniyalarga Fors ko‘rfazi davlatlarida bo‘lib turgan yurtdoshlarni repatriatsiya qilish choralarini ko‘rish topshirildi.
Ayniqsa, Jidda—Toshkent yo‘nalishida reyslarni tashkil etishga alohida e’tibor qaratish vazifasi yuklatildi.
Yig‘ilishda shuningdek, tegishli vazirlik va idoralar rahbarlariga Fors ko‘rfazi davlatlari bilan amaldagi kelishuvlarning ijro holatini tahlil qilish va eksport-import operatsiyalari uchun muqobil yo‘nalishlarni ko‘rib chiqish bo‘yicha topshiriqlar berildi. Zarur choralar vaziyatga mos ravishda tezkorlik bilan amalga oshiriladi.
Avvalroq O‘zbekistonning Kuvayt elchixonasi o‘z fuqarolariga xavfsizlik talablariga qat’iy rioya qilishni tavsiya qilgan edi.
