"Qozog‘iston arab davlatlariga zarur bo‘lgan har qanday yordamni ko‘rsatishga tayyor" — To‘qayev
Qozog‘iston Prezidenti Qosim-Jo‘mart To‘qayev AQSH, Isroil va Eron urushi jarayonida Bahrayn, Quvayt, Qatar, Saudiya Arabistoni va Birlashgan Arab Amirliklari rahbarlariga shaxsiy murojaat yo‘lladi.
The Astana Times'ning xabar berishicha, Qozog‘iston Prezidenti Bahrayn, Quvayt, Qatar, Saudiya Arabistoni va Birlashgan Arab Amirliklari rahbarlariga shaxsiy murojaat yo‘llab, ushbu davlatlar xalqlarini murakkab sinovlar davrida samimiy qo‘llab-quvvatlab, birdamlik izhor qildi.
Prezident matbuot kotibi Aybek Smadiyarov 1-mart kuni To‘qayev Qozog‘istonga do‘st va qardosh bo‘lgan davlatlarning suvereniteti hamda xavfsizligiga putur yetkazishga qaratilgan har qanday harbiy harakatlarni keskin qoralaganini ma’lum qilgan edi.
Shuningdek, Prezident To‘qayev arab davlatlariga zarur bo‘lgan har qanday yordamni ko‘rsatishga tayyor ekanini tasdiqlab ularning rahbarlari bilan faol amaliy aloqalarni saqlab qolishiga umid bildirdi.
28-fevral kuni To‘qayev Eron atrofidagi keskinlik kuchayib borayotgani va mintaqaviy beqarorlik mamlakatga ta’sir ko‘rsatishi mumkinligi fonida Qozog‘iston Xavfsizlik kengashi hamda huquqni muhofaza qiluvchi organlarga favqulodda choralar rejasini ishlab chiqishni topshirdi.
Qozog‘iston Tashqi ishlar vazirligi esa Yaqin Sharqdagi vaziyat yomonlashgani sababli mamlakatning xorijdagi diplomatik vakolatxonalari uchun favqulodda aloqa raqamlari va "ishonch telefonlari” ro‘yxatini e’lon qildi.
