Samarqandda hokimlar delegatsiyani “oilaviy safar”ga aylantirgani aniqlandi
Hokimni xotini, oʻgli, haydovchisi va boshqa umuman aloqasi boʻlmagan shaxslar xorijiy xizmat safariga yuborilgan.
Opa-uka jurnalistlar kanalida e’lon qilingan xabar natijasida Korrupsiyaga qarshi kurashish agentligi Samarqand viloyatidagi mahalliy davlat hokimiyati organlarida xorijiy xizmat safarlari, ularni e’lon qilish tartibi va belgilangan qoidalarga rioya qilinishini yuzasidan tekshiruv o'tkazdi.
Tekshiruv jarayonida viloyatning Qo‘shrabot va Kattaqo‘rg‘on tuman hokimliklari mansabdor shaxslarining xizmat safarlarida yaqin qarindoshlarini, jumladan, xotin, o‘g‘il va haydovchisini, shuningdek, safarga bevosita aloqador bo‘lmagan xodimlarni delegatsiya tarkibiga kiritgani aniqlandi.
Xususan:
Xitoyda Markaziy Osiyo davlatlarining professional fermerlari uchun tashkil etilgan seminarga Qo‘shrabot tuman hokimining haydovchisi M.T. va hokimning o‘g‘li D.D. yuborilgan.
Xitoyda tashkil etilgan “Qishloq xo‘jaligini rivojlantirish va qayta ishlashni tashkil etish” bo‘yicha maxsus o‘quv kurslarida Qo‘shrabot tumanidagi sohaga aloqador hokimlik vakillari va fermer xo‘jaliklari rahbarlari taklif etilganligi ko‘rsatilib, 32 nafar shaxsdan iborat delegatsiya tarkibi (ro‘yxat) taqdim etilgan.
Biroq, ro‘yxatni o‘rganish davomida ayrim delegatsiya vakillari, jumladan, tuman hokimining turmush o‘rtog‘i M.Sh., hokimlik boshqa mansabdor shaxsining yaqin qarindoshi Ch.H.lar ro‘yxatga asossiz ravishda kiritilganligi ma’lum bo’ldi. Shuningdek, ro’yxatdagi N.X. va M.S.lar Qo‘shrabot tumanidagi 1-son texnikum xodimlari sifatida rasmiylashtirilgan bo‘lib, aslida ular ushbu texnikumda ishlamasligi ma’lum bo‘lgan.
Bundan tashqari, tuman (shahar) hokimliklari tomonidan xorijiy xizmat safariga to‘g‘ridan-to‘g‘ri aloqador bo‘lmagan xodimlarni yuborish holatlari mavjudligi aniqlangan. Kattaqo‘rg‘on tuman hokimligi tomonidan 2025-yil 22–30-may kunlari Xitoyga tashkil etilgan xizmat safarida safarga bevosita aloqador bo‘lmagan xodim ham delegatsiyaga kiritilgan.
Tekshiruv shuni ko‘rsatdiki, Kattaqo‘rg‘on va Qo‘shrabot tuman hokimliklari xorijiy xizmat safarlari haqidagi ma’lumotlarni yashirgan, bu Prezident Shavkat Mirziyoyevning 2021-yil 16-iyundagi PF-6247-son Farmoniga zid hisoblanadi.
O‘rganish va tahlillar jarayonida to‘plangan hujjatlar qonuniy chora ko‘rish maqsadida huquqni muhofaza qiluvchi organlarga yuborildi.
