Toshkent va Namanganda 33,4 ming dona kuchli ta’sir qiluvchi dori vositalari musodara qilindi
Tezkor tadbirlar davomida noqonuniy dori savdosi bilan shug‘ullangan bir nechta shaxslar qo‘lga olindi.
Davlat xavfsizlik xizmati hamda O‘zbekiston Ichki ishlar organlari hamkorligida o‘tkazilgan tezkor tadbirlar davomida 33,4 ming dona kuchli ta’sir qiluvchi dori vositalari noqonuniy muomaladan chiqarildi. Bu haqda DXX Zamon.uzga xabar berdi.
Ma’lum qilinishicha, tezkor tadbir davomida Zangiota tumanida yashovchi 1996-yilda tug‘ilgan shaxs hamda uning 1999-yilda tug‘ilgan samarqandlik tanishi Toshkent hududida to‘xtatilib tekshirilgan. Tekshiruv jarayonida ulardan 8400 dona “Regapen” kuchli ta’sir qiluvchi dori vositalari aniqlangan.
Shuningdek, gumonlanuvchilar vaqtinchalik ombor sifatida foydalanib kelgan Chilonzor tumanidagi xonadonda o‘tkazilgan ko‘zdan kechirish jarayonida 12 600 dona “Regapen”, ishlab chiqaruvchi firmasi aniqlanmagan 10 ming dona turli dori vositalari, dorilarni qadoqlash uchun mo‘ljallangan 500 dona idish hamda qalbaki dorilar qadoqlariga yozuv tushirish uchun ishlatiladigan markerlovchi mini-printer qurilmasi ashyoviy dalil sifatida musodara qilingan.
Boshqa bir tezkor tadbirda esa Davlat xavfsizlik xizmati Toshkent shahar boshqarmasi, ichki ishlar va bojxona organlari hamkorligida 1994-yilda tug‘ilgan shaxs 6 dona “Zardeks” kuchli ta’sir qiluvchi dori vositasini 600 ming so‘m evaziga sotayotgan vaqtida qo‘lga olingan.
Tezkor tadbir davom ettirilib, ushbu dorilarni yetkazib berib kelgan Namanganda yashovchi, 1987-yilda tug‘ilgan va muqaddam sudlangan fuqaro ham poytaxt hududida ushlangan. Uning “Tracker” rusumli avtomashinasidan 12 400 dona “Zardeks” hamda 14 dona “Regapen” dori vositalari protsessual tartibda rasmiylashtirilib olingan.
Hozirda mazkur holatlar yuzasidan gumonlanuvchilarga nisbatan jinoyat ishlari qo‘zg‘atilib, tergov harakatlari olib borilmoqda.
