Toshkent viloyati prokuraturasi xodimi 9 ming dollar pora bilan qo‘lga olindi
Xodim tadbirkordan 276 million so‘mlik jarimani tanishlari orqali bartaraf qilish hamda unga nisbatan chora ko‘rilmasligini ta’minlash evaziga pul talab qilgan.
Davlat xavfsizlik xizmatining Zamon.uz ga ma’lum qilishicha, Toshkent viloyati prokuraturasining devonxona noziri O‘rtachirchiq tumanidagi yakka tartibdagi tadbirkorga tegishli savdo do‘konida elektr energiyasidan noqonuniy foydalanganlik holati bo‘yicha aniqlangan 276 million so‘mlik jarimani vakolatli tanishlari orqali bartaraf etib berish va unga nisbatan chora ko‘rilmasligini ta’minlash evaziga 9 ming AQSH dollari so‘ragan.
Shuningdek, devonxona noziri hozirda Namangan shahridagi oliygohda o‘qiyotganligi bois, talab etilgan pulni shu joyga olib kelib berishni aytagan.Davlat xavfsizlik xizmati xodimlari tomonidan o‘tkazilgan tezkor tadbirda nozir 9 ming AQSH dollarini Namangan viloyatida olgan vaqtida ashyoviy dalillar bilan ushlandi.
Holat yuzasidan Namangan viloyati prokuraturasi tomonidan ushbu shaxs va boshqalarga nisbatan Jinoyat Kodeksining 25,168-moddasi (firibgarlik) 3-qismi “v” bandi va 28,211-moddasi (pora berish) 1-qismi bilan jinoyat ishi qo‘zg‘atilib, devonxona noziriga nisbatan "qamoq" ehtiyot chorasi qo‘llanildi.
