Toshkentda narkolabiratoriya tashkil qilgan shaxs qo‘lga olindi
Qidiruv davomida 49,9 kg sintetik narkotiklar va 48 litr prekursorlar topildi.
Davlat xavfsizlik xizmatining Toshkent shahar bo‘yicha boshqarmasi va Ichki ishlar organlari hamkorligida o‘tkazilgan tezkor tadbirda 1999-yilda tug‘ilgan shaxs poytaxt hududidagi ko‘p qavatli uylarning yo‘laklariga va boshqa joylarga xorijdan olib kelingan giyohvandlik vositalarini berkitib qo‘yayotganligi aniqlanib, qo‘lga olindi.
Holislar ishtirokida shaxsning yonidan va avtomobilidan 15 dona kichik bo‘laklarda “Al’fa PVP” va 24 dona bo‘laklarda “Mefedron” giyohvandlik vositalari topildi.
Shuningdek, tezkor tadbir davomida shaxsning yashash xonadonida uyning yerto‘lasida narkolabiratoriya tashkil qilinganligi aniqlanib, jami 2,8 kg giyohvand modda va 11,5 litr prekursorlar, shuningdek laboratoriya uchun zarur asbob-uskuna va boshqa buyumlar dalil sifatida rasmiylashtirildi.
Bundan tashqari, shaxsning telefonda mavjud geolokatsiya ma’lumotlari yordamida, ilgari Sirdayo viloyatining Xovos tumanidagi yashirin joydan 49,9 kg sintetik narkotiklar va 48 litr prekursorlar topildi.
Hozirda ushbu shaxsga nisbatan Jinoyat kodeksining 28, 246-moddasi 2-qismi va 273-moddasi 5-qismi bilan jinoyat ishi qo‘zg‘atilgan va “qamoq” ehtiyot chorasi qo‘llanilgan. Tergov harakatlari davom etmoqda.
