Aholini ro‘yxatga olish tadbirining dastlabki natijalari e’lon qilindi
Tadbir doirasida 30 milliondan ortiq fuqaro onlayn tarzda mustaqil ro‘yxatdan o‘tgan.
Ma’lumotlarga ko‘ra, mazkur tadbir doirasida 30 milliondan ortiq fuqaro (xonadonlarning 82,3 foizi) onlayn tarzda mustaqil ro‘yxatdan o‘tgan. Mahalla vakillari uyma-uy yurib, planshetlar orqali jami 8,3 million xonadonni to‘liq ro‘yxatga olgan.
Shuningdek, ma’lumotlar takrorlanmasligi uchun tizim shaxsiy raqamlar (JSHSHR) yordamida avtomatik tekshirilgan.
Ro‘yxatdan o‘tmaganlar uchun alohida tavsiyalar berilgan. Ular 1851 qisqa raqamiga qo‘ng‘iroq qilib ma’lumot olishlari mumkin.
Qayd etilishicha, mart oyida ma’lumotlarning aniqligini tekshirish maqsadida tasodifiy tanlangan xonadonlarga (10% gacha) mutaxassislar qayta tashrif buyurishi mumkin. Barcha shaxsiy ma’lumotlar shifrlangan holda saqlanadi va faqat umumlashtirilgan statistik maqsadlarda ishlatiladi.
Dastlabki natijalar 2026-yil 1-iyulgacha, yakuniy tahliliy ma’lumotlar 2027-yil 1-iyulgacha e’lon qilinadi.
