"Eronga qarshi operatsiyani qancha kerak bo‘lsa, shuncha davom ettirishga tayyormiz" — Tramp
Dastlab barcha harakatlarni 3–4 hafta ichida yakunlash rejalashtirilganiga qaramasdan amaliyot muddati cho‘zilishi ham mumkin.
Qo‘shma Shtatlar Prezidenti Donald Tramp Eronga qarshi olib borilayotgan harbiy operatsiya kutilganidan uzoqroq davom etishi mumkinligini ma’lum qildi.
Tramp operatsiyani qancha kerak bo‘lsa, shuncha davom ettirishga tayyor ekanini ta’kidlab, “bunda hech qanday zerikarli jihat yo‘q”ligini bildirdi. Prezidentning so‘zlariga ko‘ra, Vashington ushbu harakatlarni Eron tomonidan kelayotgan tahdidlarni bartaraf etish uchun amalga oshirmoqda.
Oq uy rahbari Eronning raketa dasturi jadal rivojlanayotganini, hozirgi amaliyot amalga oshirilmaganda yaqin kelajakda Tehron AQSH hududiga yetib bora oladigan raketalarga ega bo‘lishi mumkinligini bildirdi .
Shuningdek, Tramp Eronning yadroviy qurolga ega bo‘lishi AQSH uchun mutlaqo qabul qilib bo‘lmas holat ekanini qayd etdi.
Donald Tramp Barak Obama ma’muriyati davrida Eron bilan tuzilgan yadroviy kelishuvdagi ishtirokini to‘xtatish qaroridan faxrlanishini bildirdi hamda Tehronning yadroviy qurolga ega bo‘lishiga yo‘l qo‘ymaslikka va’da berdi.
Prezidentning ta’kidlashicha, AQSH Eron flotini yo‘q qilish bo‘yicha harakatlarni amalga oshirmoqda va hozirga qadar o‘nta kema cho‘ktirilgan. Shu bilan birga, u Eronning yadroviy dasturi “to‘liq yo‘q qilingani”ni bildirib, Tehron boshqa hududlarda uni qayta tiklashga urinmasligi kerakligi haqida ogohlantirilganini qo‘shimcha qildi. Uning so‘zlariga ko‘ra, Eron bu ogohlantirishlarga qaramay, yadroviy qurol yaratishga intilishdan voz kechmagan.
