AQSHning Saudiya Arabistonidagi elchixonasiga dronlar zarba berdi
Donald Tramp elchixonaga qilingan hujum javobsiz qolmasligini bildirdi.
Saudiya Arabistoni poytaxti Ar-Riyoddagi AQSH elchixonasiga ikkita dron bilan hujum uyushtirilishi oqibatida diplomatik majmua hududida yong‘in chiqib, elchixona binolariga yengil moddiy zarar yetgan. Bu haqida Saudiya Mudofaa vazirligiga tayanib Al Jazeera xabar berdi.
Ma’lumotlarga ko‘ra, hujumdan so‘ng Ar-Riyodning xorijiy diplomatik vakolatxonalar joylashgan kvartali uzra qora tutun ko‘tarilgan.
Manbalar kuchli portlash ovozi eshitilgani va elchixona hududida yong‘in yuzaga kelganini bildirgan. Biroq Saudiya Mudofaa vazirligi va manbalardan biri dron hujumidan keyingi yong‘in kichik ko‘lamli bo‘lganini ta’kidlagan. Hujum paytida elchixona binosi bo‘sh bo‘lgan va jabrlanganlar haqida ma’lumotlar yo‘q.
Shuningdek, keyinroq Eronning AQSH–Isroil hujumlariga javob harakatlari doirasida Ko‘rfaz bo‘ylab amalga oshirayotgan zarbalari fonida yana bir nechta dronlar mazkur hududni nishonga olgani haqida xabarlar tarqaldi.
AQSH prezidenti Donald Tramp NewsNation nashriga bergan bayonotida elchixonaga qilingan hujum va bir nechta amerikalik harbiy xizmatchilarning halok bo‘lganini AQSH javobsiz qoldirmasligini bildirdi. "Tezda bilib olasizlar", — dedi prezident javobga ishora qilib.
Saudiya harbiy doiralariga yaqin manba AFP agentligiga maxfiylik sharti bilan ma’lum qilishicha, havo hujumidan mudofaa tizimlari Ar-Riyod Diplomatik kvartaliga yo‘naltirilgan to‘rtta dronni yo‘q qilgan.
Seshanba kuni ertalab AQSH elchixonasi Saudiya Arabistonining Ar-Riyod, Jidda va Daxron shaharlaridagi AQSH fuqarolariga hujumlar fonida xavfsiz joylardan chiqmaslik haqida ogohlantirish e’lon qilib, elchixona hududiga yaqin kelmaslikni so‘radi.
Ayni paytda, Eron Bahrayndagi AQSH harbiy bazasiga ham zarba berilganini ma’lum qildi. Bu holat AQSH–Isroil hujumlariga javob sifatida AQSH obyektlari joylashgan Fors ko‘rfazidagi arab davlatlariga bosimni kuchaytirmoqda.
