Buxoroda terrorizmni moliyalashtirishda ishtirok etgan ota va o'g'il aniqlandi
O‘g‘il Suriya davlatidagi “Tavhid va jihod katibasi” safiga qo‘shilgan, internet va kriptovalyuta orqali pullar yig‘gan.
Buxoro shahrida xalqaro terrorchilik faoliyatini moliyalashtirishga aloqador oilaviy holat aniqlanib, davlat xavfsizlik xizmati tomonidan tezkor-qidiruv tadbirlari o‘tkazildi. Bu haqda DXX Zamon.uzga xabar berdi.
Ma’lum qilinishicha, 1999-yilda tug‘ilgan fuqaro 2019-yilda Suriya davlatidagi “Tavhid va jihod katibasi” xalqaro terrorchilik tashkiloti safiga qo‘shilib, internet orqali boshqa fuqarolardan pul mablag‘larini yig‘ish va kriptovalyuta shaklida o‘tkazish bilan tashkilotning moliyaviy ta’minotini yaxshilashga yordam bergan.
2021–2025-yillar davomida u o‘zbek fuqarolarini kriptovalyuta orqali mablag‘ yuborishga da’vat qilgan, natijada katta miqdorda pul yig‘ilgan.
Shuningdek, 1965- yilda tug‘ilgan ota ham o‘g‘lining faoliyatiga jalb qilingan. Ota 2022–2025 yillar davomida “BINANCE” kripto-birjasi orqali jami 13 597 USDT mablag‘ni o‘g‘liga yuborgan.
Avvalroq u diniy ekstremizm va aqidaparastlik materiallarini tarqatgani uchun 2019-yilda 5 yilga ozodlikdan mahrum etilgan, keyinchalik shartli ravishda ozod qilingan.
Davlat xavfsizlik xizmati tomonidan olib borilgan tezkor-qidiruv tadbirlari natijasida jinoyat ishiga chek qo‘yildi.
Buxoro shahar sudining qaroriga ko‘ra, 1965-yilda tug‘ilgan ota Jinoiy kodeksning 155³-moddasi 2-qismi “a” bandi va 278⁸-moddasi 2-qismi “a” bandida ko‘rsatilgan jinoyatlarni sodir etganlikda aybli deb topilib, 10 yil 2 oyga ozodlikdan mahrum qilindi.
1999-yilda tug‘ilgan o‘g‘il esa Jinoiy kodeksning 244¹, 244², 155² va 155³-moddalari bilan ayblanib, unga nisbatan qidiruv e’lon qilindi.
