Eron bilan muzokara qilish uchun kech bo‘ldi — Tramp

AQSh prezidenti Donald Tramp Eron bilan muzokaralar olib borish imkoniyati deyarli qo‘ldan boy berilganini ma’lum qildi. U bu haqda o‘zining Truth Social ijtimoiy tarmog‘idagi sahifasida yozgan.

 

Trampning ta’kidlashicha, Eronning havo va dengiz mudofaasi tizimlari hamda harbiy salohiyatiga jiddiy zarba berilgan.

 

“Ularning havo mudofaasi, havo kuchlari, dengiz floti va rahbariyati yo‘q qilindi. Endi ular muzokara qilishni xohlashmoqda. Men esa: ‘Kech bo‘ldi’, dedim”, — deb yozgan u.

 

AQSh prezidenti o‘z postida The Washington Post nashrida e’lon qilingan maqolaga ham havola bergan. Unda ta’kidlanishicha, Eron tarixan AQSh uchun xavf sifatida ko‘rilib kelgan va shu sababli Vashington Yaqin Sharqdagi harbiy bazalarini saqlab kelmoqda. Shu bilan birga, Tramp quruqlikdagi bosqin amalga oshirmasdan turib ham mintaqadagi vaziyatni o‘zgartirishga erishganini ta’kidlagan.

 

3-mart kuni AQSh yetakchisi Qo‘shma Shtatlar Isroil bilan hamkorlikda 28-fevral kuni boshlangan Eronga qarshi harbiy operatsiya o‘z maqsadlariga erishishga yaqinlashayotganini ma’lum qilgan.

 

“Biz ularga katta zarar yetkazmoqdamiz va ularni jiddiy qo‘rqitmoqdamiz”, — dedi Tramp.

 

Oq uy rahbarining so‘zlariga ko‘ra, operatsiya rejalashtirilganidan tezroq davom etmoqda. Uning asosiy maqsadi Eronning yadroviy infratuzilmasi hamda raketa salohiyatini yo‘q qilishdan iborat.

 

Shuningdek, Tramp AQShning qurol zaxiralari deyarli cheksiz ekanini bildirib, zarurat tug‘ilganda mamlakat uzoq muddatli harbiy operatsiyalarni ham muvaffaqiyatli olib borish imkoniyatiga ega ekanini ta’kidlagan.

 

Avvalroq, 2-mart kuni Ali Larijoniy Eron AQSh bilan muzokara olib borish rejalari yo‘qligini ma’lum qilgan edi. Bundan bir kun oldin esa Tramp Tehron Vashington bilan muzokara qilishga tayyorligini bildirganini aytgan edi.