Eronda AQSh va Isroil hujumlari oqibatida halok bo‘lganlar soni 800 ga yaqinlashdi
Ma’lumotlarga ko‘ra, mamlakatning 153 hududida 1039 ta zarba qayd etilgan.
Eron hududiga qilingan harbiy zarbalar oqibatida halok bo‘lganlar soni 787 nafarga yetdi. Bu haqda Tasnim News Agency Eron Qizil Yarim Oy Jamiyati ma’lumotlariga tayanib xabar berdi.
Ma’lum qilinishicha, maxsus qutqaruv guruhlari tomonidan taqdim etilgan hisobotlarga ko‘ra, Eron hududiga AQSh va Isroil tomonidan berilgan zarbalar natijasida bugungi kungacha 787 nafar fuqaro halok bo‘lgan.
Hozirda mamlakatning turli hududlarida qidiruv-qutqaruv ishlari davom etmoqda. Qutqaruv xizmatlari vayronalar ostida qolganlarni qidirish, jarohatlanganlarni evakuatsiya qilish hamda ularga zarur tibbiy yordam ko‘rsatish bilan shug‘ullanmoqda.
Rasmiy ma’lumotlarga ko‘ra, hujumlar davomida Eronning 153 hududida jami 1039 ta zarba qayd etilgan. Ushbu zarbalar oqibatida kamida 504 ta obyekt turli darajada zarar ko‘rgan.
Qayd etilishicha, favqulodda xizmatlar vayronalarni tozalash, jarohatlanganlarni tibbiyot muassasalariga yetkazish hamda jabrlanganlarga yordam ko‘rsatish ishlarini uzluksiz davom ettirmoqda.
Mutasaddi tashkilotlar hududlarda vaziyatni nazorat ostida ushlab turish va zarar ko‘rgan aholiga yordam ko‘rsatish bo‘yicha zarur choralarni ko‘rmoqda.
