Samarqandda MIB orqali 2 728 nafar ishsiz ishga joylashdi

Majburiy ijro byurosi viloyat boshqarmasi organlari tomonidan aliment undirish hamda oilalar manfaatlarini himoya qilish borasida 2025 yilda tizimli ishlar amalga oshirildi.

 

Jumladan, aliment oluvchilar manfaatlarini taʼminlash maqsadida 2,2 mlrd so‘m naqd pul mablag‘lari oldindan to‘lov sifatida undirilishi taʼminlandi. Shuningdek, 135 nafar undiruvchiga Aliment to‘lovlari jamg‘armasi hisobidan 1 mlrd 446 mln so‘mga yaqin mablag‘ to‘lab berildi.

 

Olib borilgan profilaktik tadbirlar natijasida ham salmoqli ijobiy ko‘rsatkichlarga erishildi. Mahalla “yettiliklari” bilan hamkorlikda o‘tkazilgan profilaktik suhbatlar va ko‘rilgan chora-tadbirlar samarasida 6 798 ta oila yarashtirilib, oilalar tiklanishiga erishildi.

 

Bundan tashqari, mutasaddi idoralar bilan hamkorlikda tashkil etilgan tadbirlar doirasida 2 728 nafar ishsiz aliment to‘lovchi ishga joylashtirilib, ularning doimiy bandligi taʼminlandi.

 

Shu bilan birga, qonun ustuvorligi va jazo muqarrarligini taʼminlash maqsadida aliment to‘lashdan qasddan bo‘yin tovlab kelgan 995 nafar shaxs Maʼmuriy javobgarlik to‘g‘risidagi kodeksning 474-moddasiga asosan maʼmuriy javobgarlikka tortildi. Shuningdek, 137 nafar shaxs Jinoyat kodeksining 122-moddasiga muvofiq jinoiy javobgarlikka tortildi.

 

Amalga oshirilgan mazkur chora-tadbirlar aliment undirish tizimi samaradorligini oshirish, oilalar barqarorligini taʼminlash va fuqarolarning qonuniy huquq hamda manfaatlarini himoya qilishga xizmat qilmoqda.