Toshkentda 5 oylik chaqaloq vaksinadan so‘ng operatsiya qilindi
Ma’lum bo‘lishicha, bola emlanganidan so‘ng oyog‘i yiringlab ketgan.
Ijtimoiy tarmoqlarda Toshkent shahrida onaning farzandi vaksina olganidan so‘ng oyog‘i yiringlagani aytilgan videomurojaat tarqalgandi. Poytaxt sog‘liqni saqlash vazirligi holat yuzasidan rasmiy munosabat bildirdi.
Qayd etilishicha, vaziyatga aniqlik kiritish maqsadida Sog‘liqni saqlash vazirligi Ishchi guruhi tomonidan epidemiologik tekshiruv amalga oshirilgan.
Aniqlanishicha, joriy yil 23-fevral kuni Yakkasaroy tumanidagi 58-son oilaviy poliklinikada besh oylik Sh.I.ga 2865 X 008 A seriyali Pentavalent (AKDS+VGV+XIB)-2, OPV-3 va ROTA-3 vaksinalari bilan rejalashtirilgan emlash o‘tkazilgan. E’tiroz bildirilgan Pentavalent vaksinasi 2027-yil oktyabrigacha yaroqli hisoblanadi.
“22-yanvardan 23-fevralga qadar ushbu poliklinikada mazkur vaksina bilan 78 nafar bola emlangan. Sh.I. emlangan kunda esa 17 nafar bola vaksina olgan bo‘lib, ularda noxush holatlar kuzatilmagan. Emlashni amalga oshirgan vaksinator 6-yillik ish tajribasiga ega”, deyiladi rasmiy bayonotda.
24-fevral kuni patronaj hamshirasi tomonidan chaqaloqning inyeksiya qilingan joyida qizarish va og‘riq, tana haroratining 37,5 darajagacha ko‘tarilishi qayd etilgan. 25-fevral kuni pediatr tomonidan o‘tkazilgan ko‘rikda bolaning ahvoli qoniqarli ekani, inyeksiya joyining yuqori qismida 3x3 sm o‘lchamda qattiqlik va giperemiya borligi aniqlangan.
Keyinchalik chap sonning yuqori qismida absess aniqlanib, 27-fevral kuni jarrohlik yo‘li bilan ochilgan. Mutaxassislar absess emlash joyidan yuqoriroqda joylashganini va vaksinatsiya bilan bog‘liq emasligini bildirgan. Hozirgi vaqtda bolaning holati qoniqarli ekani aytilmoqda.
Mutaxassis xulosasiga ko‘ra, absess paydo bo‘lishiga sifatsiz taglikdan noto‘g‘ri foydalanish, teri qichishishi natijasida mexanik shikastlanish, shamollash va immunitet pasayishi hamda son sohasining uzoq vaqt ezilishi sabab bo‘lgan.
Ta’kidlanishicha, 2025-yil sentyabr oyida mamlakatga 2 mln 600 ming doza 2865 X 008 A seriyali Pentavalent vaksinasi olib kelingan. Ushbu seriya bilan respublika bo‘yicha 1 milliondan ortiq, Toshkent shahrida 50 mingdan ziyod bola emlangan bo‘lib, vaksinatsiyadan keyingi nojo‘ya holatlar qayd etilmagan.
