YTH oqibatida vafot etgan kichik serjant Xosilbek Eshnazarov "Jasorat" medali bilan taqdirlandi
Yo‘l-patrul xizmati xodimi BMW rusumli avtomobil urib yuborishi oqibatida halok bo‘lgan edi.
O‘zbekiston Respublikasi Prezidenti farmoniga ko‘ra, Toshkent shahar Ichki ishlar bosh boshqarmasi Yo‘l harakati xavfsizligi boshqarmasi yo‘l-patrul xizmati inspektori, marhum kichik serjant Eshnazarov Xosilbek Beknazar o‘g‘li "Jasorat" medali bilan mukofotlandi.
Farmonda qayd etilishicha, u ichki ishlar organlaridagi fidokorona xizmati, jinoyatchilikka qarshi kurashish, jamoat xavfsizligi va fuqarolar osoyishtaligini ta’minlash, yo‘l-transport hodisalarining oldini olish hamda qoidabuzarliklar profilaktikasini samarali amalga oshirishdagi katta xizmatlari uchun taqdirlangan.
Shuningdek, marhum xizmat burchini sidqidildan va yuksak sharaf bilan ado etib, mardlik va fidoyilik namunasini ko‘rsatgani, yosh avlodni Vatanga muhabbat va sadoqat ruhida tarbiyalashdagi faol ishtiroki alohida ta’kidlangan.
Eslatib o‘tamiz, O‘zbekiston Ichki ishlar vazirligi 25-fevral kuni kechqurun Toshkentda BMW M4 (raqami 010210OC) avtomobili Yo‘l-patrul xizmati xodimini urib ketgani aks etgan videoni e’lon qilgandi. Rulda esa haydovchilik guvohnomasiga ega bo‘lmagan 16 yoshli 10-sinf o‘quvchisi bo‘lgan.
Keyinchalik ushbu transport vositasi 2002-yilda tug‘ilgan qizga tegishli bo‘lib, avtomobil 2024-yildan shu kunga qadar 18 marotaba transport vositasini boshqarish huquqi bo‘lmagan shaxsga haydash uchun berilgani aniqlangandi.
