Zangiotada erkak 125 mln aliment to‘ladi
Shu tariqa ijro hujjati tamomlanib, erkak Qozog‘iston Respublikasiga ishlash uchun yo‘l olgan.
Fuqarolik ishlari bo‘yicha Zangiota tumanlararo sudining 2024 yil 28 avgustdagi qarori bilan qarzdor b.M.dan undiruvchi G.M. foydasiga bir nafar farzandining moddiy taʼminotini taʼminlash maqsadida har oyda oladigan daromadining yarmi miqdorida aliment undirish belgilangan.
Ushbu ijro hujjati Majburiy ijro byurosi Zangiota tuman bo‘limi ish yurituviga kelib tushgan bo‘lib, bo‘lim davlat ijrochilari tomonidan ijro harakatlariga olib borilgan.
Ijro harakatlari davomida qarzdor fuqaro qarzdorlikni ixtiyoriy ravishda bartaraf etmaganligi sababli Qonunning 42(1) moddasiga asosan uning Respublikamiz hududidan chetga chiqish huquqlari vaqtincha cheklangan.
Qarzdorning yaqin qarindoshlari unga chet davlatda yuqori daromadli ish taklif qilganligi sababli unda chetga chiqishga ehtiyoj paydo bo‘lgan.
Shu sababli, qarzdor ota joriy yilning fevralida Byuroning Zangiota tuman bo‘limiga kelib, undiruvchi bilan kelishgan xolda qarzdorligini ixtiyoriy ravishda to‘ladi va aliment mablag‘lari undiruvchiga undirilib berildi.
Shundan so‘ng, ijro hujjati undiruvchining arizasiga asosan Qonunning 40(1)-moddasiga asosan tamomlandi.
