Dohada 500 dan ortiq o‘zbekistonlik vaqtincha mehmonxonalarda yashamoqda
Elchixona ularga zarur amaliy yordam ko‘rsatmoqda.
Yaqin Sharq mintaqasidagi beqaror vaziyat sabab Qatar poytaxti Doha shahrida 500 nafardan ortiq O‘zbekiston fuqarolari vaqtincha mehmonxonalarda yashamoqda. Bu haqda “Dunyo” axborot agentligi xabar berdi.
Ma’lum qilinishicha, O‘zbekistonning Dohadagi elchixonasi xodimlari vatandoshlardan muntazam xabar olib, ularga zarur amaliy yordam ko‘rsatmoqda.
Xususan, 3-mart kuni diplomatik vakolatxona xodimlari “La Villa” va “OYYO Hotel” mehmonxonalariga tashrif buyurib, u yerda vaqtincha yashab turgan fuqarolar bilan uchrashgan hamda ularning shaxsiy ma’lumotlari asosida ro‘yxat tuzilgan.
Shuningdek, elchixona hamda “Vatandosh” jamoat fondi vakillari mehmonxonalarda istiqomat qilayotgan ayrim ehtiyojmand fuqarolar uchun iftorlik tashkil qilgan.
Tibbiy yordamga muhtoj bo‘lgan vatandoshlar esa Hamad kasalxonasiga yetkazilgan.
Bundan tashqari, Doha shahrida sodir bo‘lgan yo‘l-transport hodisasi oqibatida vafot etgan O‘zbekiston fuqarosini dafn etish uchun zarur hujjatlarni rasmiylashtirishda ham elchixona tomonidan ko‘mak ko‘rsatilgan. Qatar vakolatli organlari bilan hamkorlikda dafn marosimi tashkil etilgan.
Ayni paytda Qatarning havo hududi yopiq holda qolmoqda.
