Iroqlik adibning O‘zbekiston haqidagi kitobi nashrdan chiqdi
Kitob Yaqin Sharqda sodir bo‘layotgan mojarolar fonida xalqaro hamjamiyat uchun dolzarb ahamiyat kasb etadi.
Qohira shahridagi "Al-Vefaq" ("Dar al-Wefaq Publishing & Distribution") nashriyotida iroqlik adib Ahmad Jasim Zubaydining “Ma’naviyat – Yangi O‘zbekistonning Zuhro yulduzi. Islom – insoniylik, bilim va ma’rifat falsafasi” nomli kitobi nashrdan chiqdi. Bu haqida O‘zA e’lon qilgan maqolada ma’lum qilindi.
Maqolada qayd etilishicha, kitobda O‘zbekiston Prezidenti Shavkat Mirziyoyevning insonparvarlik, ma’naviy va ilmiy-ma’rifiy sohada olib borayotgan siyosati va global tashabbuslari aks ettirilgan. Muallif bu asar oddiy voqealar solnomasi emas, balki xalqaro hamkorlik, tinchlik va ma’naviy qadriyatlarni mustahkamlashga qaratilgan chuqur mushohadasi ekanini ta’kidlagan.
Nashriyot bosh direktori Abud Mustafa Abudning so‘zlariga ko‘ra, kitob Yaqin Sharqda sodir bo‘layotgan mojarolar fonida xalqaro hamjamiyat uchun dolzarb ahamiyat kasb etadi.
Ahmad Zubaydiyning ta’kidlashicha, arab olamida O‘zbekistonning ichki va tashqi siyosati katta hurmat bilan kuzatilmoqda, Markaziy Osiyoda qadriyatlar jonlanmoqda va Shavkat Mirziyoyevning tashabbuslari mintaqa davlatlari o‘rtasidagi do‘stlik va hamkorlikni mustahkamlashga xizmat qilmoqda.
Kitob O‘zbekiston Xalqaro Islom akademiyasi, Toshkentdagi Islom sivilizatsiyasi markazi va Samarqanddagi Imom Buxoriy xalqaro ilmiy-tadqiqot markazi kabi muassasalar faoliyati bilan uzviy bog‘liq bo‘lib, yoshlarni tarbiyalash va ma’naviyatni rivojlantirishga qaratilgan.
