NATO Eron bilan bog‘liq mojaroga aralashmaydi — Mark Ryutte
NATO bosh kotibi Mark Ryuttening ma’lum qilishicha, alyansda AQSH va Isroilning Eronga qarshi harbiy operatsiyasida qatnashish bo‘yicha “hech qanday rejalari yo‘q”.
NATO bosh kotibi Mark Ryutte Eron bilan bog‘liq mojarolarda alyans ishtirok etmasligini ma’lum qildi.
Ryuttening aytishicha, NATOdagi ayrim ittifoqchilar AQSHni Isroil bilan birgalikdagi harbiy harakatlarda qo‘llab-quvvatlash uchun barcha imkoniyatlarni ishga solayotgani alyansning ishtirokini anglatmaydi. Shuningdek, kotib NATOning havo mudofaa tizimlarining zaxiralariga to‘xtalib, ular yetarli darajada ekanini qayd etdi.
Shu bilan birga Ryutte mudofaa sanoatining yanada tez rivojlanishi uchun Germaniyadagi Rheinmetall kompaniyasi va boshqa ko‘plab Yevropa hamda AQSHdagi mudofaa korxonalari birgalikda zarur ishlarni qilayotganini ta’kidlab o‘tdi.
“Biz Eron va Fors ko‘rfazi hududini muhokama qilyapmiz — bularning barchasi NATO hududidan tashqarida. NATO hududi borasida esa biz doimiy hushyorlikni saqlaymiz va uning ishonchli mudofaasini ta’minlaymiz.” — deya qo‘shimcha qildi Ryutte.
Bosh kotib shuningdek, AQSH vaziyatni past baholagan degan fikrga qo‘shilmasligini aytdi. Unga ko‘ra, AQSH va Isroilning harakatlari juda muhim bo‘lib, ular Eronning yadroviy qurolga ega bo‘lish salohiyatini cheklashga xizmat qilmoqda.
