Qarshi va Buxoroda bozor mansabdorlariga nisbatan jinoyat ishi qo‘zg‘atildi
Ular bozor hududidagi savdo joylarini noqonuniy rasmiylashtirib berish evaziga 11-80 ming dollar miqdorda pul talab qilgan.
Davlat xavfsizlik xizmati hamda boshqa huquqni muhofaza qiluvchi organlar xodimlari tomonidan o‘tkazilgan tezkor tadbirlar davomida dehqon bozorlarida sodir etilgan korrupsion holatlar fosh etildi. Tekshiruvlarda ayrim mansabdor shaxslar auksion orqali sotilishi lozim bo‘lgan savdo nuqtalarini shaxsiy moddiy manfaat evaziga noqonuniy ravishda fuqarolarga sotish bilan shug‘ullangani aniqlangan. Bu haqda DXX Zamon.uzga xabar berdi
Xususan, Qarshi shahrida faoliyat yurituvchi dehqon bozori raisi va nazoratchisi o‘zaro til biriktirib, bozor hududida yangi qurilgan 110 kvadrat metr maydonga ega savdo do‘konini tadbirkorlik bilan shug‘ullanishni rejalagan fuqaro nomiga rasmiylashtirib berish evaziga undan 80 ming AQSH dollari talab qilgan. Ular oldindan 30 ming AQSH dollarini olayotgan vaqtida ashyoviy dalillar bilan qo‘lga olingan.
Mazkur holat yuzasidan gumonlanuvchilarga nisbatan Jinoyat kodeksining 168-moddasi 4-qismi “a” bandi hamda 28, 211-moddasi 3-qismi “a” bandi bilan jinoyat ishi qo‘zg‘atilib, tergov harakatlari olib borilmoqda.
Shuningdek, yana bir holatda Buxoro shahridagi qishloq xo‘jaligi mahsulotlari ulgurji savdosi amalga oshiriladigan bozorda ham shunga o‘xshash qonunbuzarlik aniqlangan. Bozor rahbari va ish yurituvchisi o‘zaro til biriktirib, bozor hududida yengil konstruksiyali savdo do‘koni qurish hamda tadbirkorlik faoliyati bilan shug‘ullanishi uchun 120 kvadrat metr yer maydoni ajratib berish evaziga fuqarodan 11 ming AQSH dollari olgan vaqtida ularning noqonuniy harakatlariga chek qo‘yilgan.
Mazkur holat bo‘yicha ham Jinoyat kodeksining 168-moddasi 3-qismi “a, v” bandlari bilan jinoyat ishi qo‘zg‘atilib, hozirda tergov harakatlari davom etmoqda.
