Qo‘qondagi uyda gaz portlash sababi aniqlandi
Hodisa nosoz va nostandart gaz shlangidan foydalanish tufayli sodir bo‘lgan
Favqulodda vaziyatlar vazirligining Qo‘qondagi uyda bir kishining halok bo‘lishiga olib kelgan gaz portlashi sabablarini o‘rganilganini ma’lum qildi.
Vazirlik axborot xizmati rahbari Murod Sodiqovning bildirishicha, mutaxassislar tomonidan o‘rganish jarayonida, mazkur holat sodir bo‘lgan xonadonda uy egasi gaz plitasini ishlatgan paytda nosoz va nostandart shlangdan foydalangan va natijada portlash yuzaga kelgan.
FVV vakili gaz aniqlovchi analizator, ya’ni agar xonaga gaz sizib chiqsa, manbayini o‘chiradigan qurilma haqida ham ma’lumot berib, avtomatlashgan tizim va eng xavfsiz hisoblanishini ta’kidladi.
Qo‘qon shahridagi "Bo‘ston" mahalla fuqarolar yig‘ini hududida joylashgan ko‘p qavatli uyda gaz portlashi 25-fevral kuni sodir bo‘lishi oqibatida yong‘in kelib chiqqandi. Baxtsiz hodisa sabab ushbu xonadonda istiqomat qilgan, 2007-yilda tug‘ilgan fuqaro beton qoplama (plita) bosib qolib, og‘ir tan jarohati olgan va voqea joyida vafot etgan.
Holat yuzasidan Jinoyat kodeksining 259-moddasi 2-qismi "a" bandi (yong‘in xavfsizligi qoidalarini buzish odam o‘lishiga sabab bo‘lishi) bilan jinoyat ishi qo‘zg‘atilib, jinoyat ishi Tergov departamenti tomonidan nazoratga olindi.
