Toshkentda avtobus bekatlaridagi do‘konlar olib tashlanadi
360 dan ortiq bekat va 190 ta katta-kichik chorraha xatlovdan o‘tkazildi.
Toshkent shahar hokimligining ma’lum qilishicha, Toshkent shahridagi avtobus bekatlaridagi do‘konlar olib tashlanadi.
“Xalqaro tajribaga ko‘ra, jamoat transporti bekatlarining zamonaviy konsepsiyalari bekat hududida savdo obyektlarining bo‘lmasligini, yo‘lovchilarning transportni erkin va xavfsiz kutishini, platformalarning yetarlicha keng bo‘lishini hamda tirbandlik yuqori bo‘lganda ularni kengaytirish imkoniyatini, shuningdek, inklyuziv muhit yaratilishini ta’minlaydi”, deyiladi hokimlik xabarida.
Avvalroq, Yo‘l harakatini tashkil etish markazi mutaxassislari poytaxtning eng tirband 472 km avtomobil yo‘lini aniqlagani haqida xabar berilgan edi. Hokimlik ma’lumotiga ko‘ra, birinchi bosqichda 100 kmlik masofa qamrab olinib, 360 dan ortiq bekat va 190 ta katta-kichik chorraha xatlovdan o‘tkazilgan.
O‘tkazilgan audit natijalari jamoat transporti yo‘nalishida bekatlar o‘rnida 110 ta savdo obyekti joylashganini ko‘rsatgan. Ulardan 61 tasi bekat majmuasi hududiga egalik qilish va uni tasarruf etish huquqini tasdiqlovchi hujjatlarni taqdim eta olmagan. Ularning faoliyatiga huquqiy baho berilib, tegishli choralar ko‘riladi.
Shahar ma’muriyatining tegishli qaroriga asosan barcha bekatlar yangilanadi. Ruxsat beruvchi hujjatlarga ega tadbirkorlarga savdo nuqtalarini o‘rnatish uchun boshqa joy ajratish orqali kompensatsiya to‘lash mexanizmi ko‘zda tutilgan.
