Toshkentda yonida homilador ayoli bor haydovchiga hujum qilgan ota va o‘g‘ilga hukm o‘qildi
Hodisa oqibatida haydovchining ayoli homilasidan ayrilgan.
Toshkent shahrining Yakkasaroy tumanida Jentra rusumli avtomobil haydovchisiga nisbatan sodir etilgan hujum ishi bo‘yicha sud hukmi e’lon qilindi. Bu haqda Toshkent shahar sudi matbuot xizmati Zamon.uz ga ma’lum qildi.
Yakkasaroy tumani jinoyat ishlari bo‘yicha sudi tomonidan 24 yoshli yigit va uning 55 yoshli otasi guruh bo‘lib sodir etilgan bezorilikda aybdor deb topildi.
Dastlab ularga qasddan og‘ir tan jarohati yetkazish aybi qo‘yilgan edi. Biroq sud-tibbiy ekspertiza xulosasiga ko‘ra, jabrlanuvchining rafiqasida faqat yengil tan jarohatlari aniqlangan. Shuningdek, hodisadan avval homiladorlikni tasdiqlovchi tibbiy hujjatlar taqdim etilmagani sababli homila tushgani haqidagi xabar o‘z tasdig‘ini topmagan. Shu asosda ayblov bezorilik moddasi bilan qayta tasniflandi.
Sud hukmiga ko‘ra, har ikki sudlanuvchiga ikki yil muddatga ozodlikni cheklash jazosi tayinlandi. Hibsda o‘tkazilgan vaqt inobatga olinib, yakuniy jazo sifatida1 yil 6 oy 24 kun ozodlikni cheklash belgilandi.
