Xomaniynig o‘g‘li Mujtabo Xomanaiy yangi oliy rahbar etib saylandi — Iran International
Eronlik siyosatchilardan farqli ravishda, Mujatbo ommaviy chiqishlardan chetda bo‘lib, faoliyatini soyada olib borgan.
Muxolifat nashr hisoblangan Iran International nashrining manbalarga tayanib xabar berishicha, Eron Islom Respublikasining Ekspertlar kengashi Mujtabo Xomanaiyni Eronning yangi oliy rahbari lavozimga sayladi.
Qayd etilishicha, 56 yoshli Mujtabo Xomaniy marhum Oyatulloh Ali Xomanaiyning o‘g‘li. So‘nggi o‘n yil davomida u ochiqchasiga “voris” sifatida tilga olib kelingan.
Ko‘plab eronlik siyosatchilardan farqli ravishda, Mujatbo ommaviy chiqishlardan chetda bo‘lib, faoliyatini soyada olib borgan. U Islom inqilobi qo‘riqchilari korpusi va maxsus xizmatlar tizimida tajriba orttirgan. 2000-yillar o‘rtalaridan boshlab u “kuch bloki”ni nazorat qilgani, armiya, dengiz va havo kuchlari ustidan otasiga ko‘mak bergani aytiladi. Mujtabo inqilobni proksi kuchlar orqali eksport qilish strategiyasining muallifi sifatida ko‘riladi.
Tahlilchilarning fikricha, Eronda rahbar almashishi siyosiy yo‘nalish o‘zgarishini anglatmaydi, balki uslub o‘zgarishini bildiradi. Mujtabo “gibrid urush” tarafdori va G‘arb bilan keskin qarama-qarshilikni yoqlaydi. Uning davrida yadro dasturi bo‘yicha muzokaralar to‘xtab qolishi yoki yanada qattiq shartlar bilan davom etishi mumkin.
Mujtaboning lavozimga ko‘tarilishi inqilobiy islom tizimi sifatida tashkil etilgan Islom Respublikasining sulolaviy boshqaruv tomon rivojlanayotgani haqidagi tanqidlarni kuchaytirishi mumkin.
